Ka jingnang jingstad kam dei tang ka lad ïohkam sorkar hynrei ban ïakynduh ki jingeh ha jingim: Lahkmen

Shillong, Risaw 09: Ka St. Joseph’s Secondary School, Laitkor, East Khasi Hills, ka la rakhe ïa ka jingdap spah snem (1926-2026) jong ka da ka prokram kaba la pynlong ban pynkup burom bad ai khublei ïa ki nonghikai jong ka, ki nonghikai barim bad ki khynnah skul barim.
Ïa kane ka prokram la pynkup burom da u Myntri ka tnat Pule Puthi u Bah Lahkmen Rymbui kum u Kongsan, ha ka jingïadonlang u Bah A.L. Hek, MLA, u Fr. Francis Kharpran, ki nonghikai, ki nonghikai barim, ki kmie ki kpa bad ki khynnah skul. Ha kane ka prokram la pyni ruh ïa ki jingshad jong ki khynnah skul bad ki jingpyrkhat halor ka jingïaid lynti jong ka skul kaba la neh shispah snem bad ka jingnoh synñiang jong ka sha ka pule puthi.
Haba kren ha kane ka jingïalang, u Bah Lahkmen Rymbui u la ban jur ba ka jingnang jingstad kam dei tang ka lad ban ïoh ïa ka kam sorkar hynrei ka dei ka atiar ban ïakynduh ïa ki jingeh ha ka jingim bad ban long kiba lah ban shaniah halade. U la pynpaw ruh ïa ka jingdonkam ban ithuh bad pynroi ïa ki sap shimet ryngkat bad ka jingpule kaba pura.
U Myntri u la kren shaphang ki jingthmu jong ka Sorkar Meghalaya ban ailad ïa ki samla ban kyntiew ïa ki sap ki phong bad pynshlur ïa ki samla pule ban wad ïa ki sap ki phong jong ki, katba u ïathuh ba ym don kano kano ka kam kaba kham duna ne kham halor. U la kyntu ruh ïa ki nonghikai ba kin ïai pynthymmai bad pyntbit biang ïa lade ha kaba ïadei bad ka jingkylla ka pyrthei bad ka jingkiew ha ka juk stad saïan.
Katba na ka liang u A.L. Hek kum u symbud kongsan u la ïaroh ïa ki nongseng ïa kane ka jaka pule kiba la wanrah ïa ka jingshai jong ka pule puthi sha Laitkor bad u la ai mynsiem ruh ïa ki samla pule ba kin trei shitom, kin long kiba ïai neh haba ïakynduh ïa ki jingeh bad ban sngewthuh ïa la ka jong ka bor bad ka sap.
Ka jingrakhe dap shispah snem ka la long ka dak kaba kongsan ha ka histori jong ka St. Joseph Secondary School haba burom ïa kaba la leit bad ban ai mynsiem pat ïa kaba mynta ba kan nangkiew na ka sngi sha ka sngi bad na ka por sha ka por.