Shillong, Risaw 09: Ka Meghalaya Police ka la pynthikna ba kan don bynta ha ka SSA Super Cup ka ban wan hadien ba ka la pynliem noh ïa ka Laitkor da 2-1 hynne ka sngi Thohdieng ha ka Shillong Premier League 2026 ha SSA Stadium.
U Everestarly Rynjah (41’, 69’) u la pynkhihjar ar sien na ka bynta ka MLP katba u Shelbilkstar Kharshilot (90’+2) u la thep ïa ka shi kol ha ka khyllipmat ba khatduh na ka bynta ka Laitkor.
Da kane ka namjop mynta ka MLP ka la kamai 14 point, bad ka la knieh biang ïa ka kyrdan ba san na ka Sawmer (12 point), bad lah ban kdew ba kam satia ka resol kaba sniew ïa ka MLP ha kane ka samoi kaba nyngkong hadien ba ka la wanphai biang sha ka SPL naduh u snem 2018. Katba ka Laitkor, watla ka la ïakhun tyngeh hynrei ka la lah ban pyndep tang ha ka kyrdan kaba khyndai da kaba kamai 6 poiñ bad kan shah pynhiar noh sha ka First Division ha u snem ban wan ryngkat bad ka Mylliem kaba don sha trai duh.
Mynta ka sngi kan dei ka sngi khatduh jong ka SPL 2026 bad kine ki jingïalehkai kin rai ïa ki kyrdan jong ki kynhun ba ïaknieh rung ha ka thup Top 6 jong ka league, ka ban don ka jingktah ym tang ïa ka SSA Super Cup ka ban sa wan (kaba kynthup tang ïa ki Top 6 na ka SPL) hynrei wat ïa ka SSA Champions Cup kaba hadien (ha kaba tang kiba wan Top 2 na kawei pa kawei ka lympung phutbol jong ka SSA).
Por 1 baje ka Shillong Lajong kan aireng pyrshah ïa ka Rangdajied United. Ka jingjop ïa ka Lajong kan pynthikna ba kan pyndep kum ka Runners-up,; Por 4:30 baje janmiet ka Nongkseh pyrshah ïa ka Langsning.
