Lada ka dawa ka kam wat ban ïohi ïa ka syrngiew jingiap ka KSU kam salia : President KSU

Shillong, Naitung 30: U President ka Khasi Stundents’ Union (KSU) Samla Lambokstarwell Marngar ha ka sngi Saitjaiñ u la maham tyngeh ïa ka sorkar India halor ka jingbym pat khylliap ka jong ka ïa ka mat tih Urinaium na ka jylla bad ïa ka jingarsap ka sorkar jylla ha kaba ïa dei bad kane ka mat. U Samla Lambok u la ai jingïaroh ruh ïa ka sienjam kiba u MLA barim ka Nongkrem u Bah Ardent u la shim ha kaba ïadei bad ka jingpyrshah tih uranium.
“Ha ki snem kiba la leit ngi don ki nongthaw aiñ kiba ïeng skhem beit triang ban pyrshah ïa u uranium ngin peit mynta napdeng ki 60 ngut katno na pdeng jong ki kiba ieid shisha ïa ka jaidbynriew. U Ma Ieid Hopingstone u la ïeng skhem haduh ki sngi kiba un khlad noh bad wat i meiieid Spelity Lyngdoh i bym pyndep satia ïa ka jingpule bad iba duna ka jingtip, i ïeng beit triang namar ka bor shemphang jong i ban peit na ka bynta ka jylla ka kham tam ban ïa kiwei pat” ong u Samla Lambok haba kren bad ki nongthoh khubor.
“Dang ha kine ki khyndiat snem kiba la leit ngi don u MLA uba pyni ba u ieid shisha ïa ka jaidbynriew uba mih khmat na Nongkrem u Bah Ardent M Basaiawmoit uba ïeng skhem beit ban pyrshah ïa ka jingtih Uranium ha kaba u la leit ruh wat ban jurip da lade ban peit ïa ka jingktah ka jingtih uranium ha Jaduguda ha ryngkat ki nongthoh khubor” u la ong
Haba la kylli pat la ka KSU kan dawa ne em ba ka Ïing Dorbar Thaw Aiñ kan wanrah da ka resolution ba kum ka jylla kam pdiang ïa kane ka jingthmu ka sorkar India u Samla Lambok u la ong, “Ngim donkam ban hikai skul ïa ki, lada ki ieid ïa ka jaidbynriew ki dei ban sngewthuh la ka kamram ba kin leh”.
“Kampher lada don ne ym don nongmih khmat kiba kyrsan ïa ka KSU hynrei ka KSU ka long kaba la khreh ban ïeng marwei halor kane ka mat” u la bynrap.
“Lada ka dawa ka kam wat ban ïaid ïa ki them bad ki lyhuh kiba jylliew wat haduh ban ïohi ïa ka syrngiew ka jingïap ka KSU kam salia” u la ong.
Shuh shuh u la ong ruh ba bunbsien ka sorkar ka ju pyndonkam da ki para Khasi ban ïoh tih uranium.
“Ngi ïohi ha ki snem kiba la leit ka sorkar ka pyrshang ban pharia ïa ka jaidbynriew ha kaba ka pynkha ïa ki seng bhalang kiba kyrshan ïa ka jingthmu jong ka” u la ong.
Shuh shuh u la ong ruh ba ka India kam dei satia ban tih uranium na ka jyllla na bynta ka jingshngaiñ jong ka kaba buh jingeh kaban neh ïa ka jaidbynriew da ki hajar snem.
“Lada thom da ka bor ïa ka jaidbynriew to pynbna shuwa ba ngim dei shuh ka bynta jong ka India hangta ngin sa sngewthuh kaei ba ngi dei ban leh” u la ong.
U Samla Lambok u la khot ruh ba kum ka jaidbynriew kam dei ban ngop ha ki jingpynthame ka sorkar da ki tyngka khmtam eh ïa ki trai jaka ba kin ai lad ban khlong ïa une u mar poh khyndew ba long bih uba u kynrad u la tep sha khyndew u la ong.