Shillong, Naitung, 30: Ka Meghalaya Tourism Development Forum (MTDF) ka la pynlong ïa ka jingïalang sngewlem na ka bynta ka jingkhlad noh jong u Chairman ba nyngkong eh jongka u bah R.G Lyngdoh kaba la jia ha ka 22 tarik Naitung 2022. Nalor kiwei kiwei ki jingnoh synniang jongu ka MTDF ka sngewdonbok ban ïoh ïa u kum u Chairman ba nyngkong eh jongka namar ha ka jingïalam jongu ka Forum ka la lah ban leh shibun ki kam. Ka jingkhlad noh jongu ka la long ka jingduh kaba khraw ïa ka Forum, ïa ka ïing ka sem, ki khun ki kti bad khamtam eh ïaka jylla hi baroh kawei.
“Ha kane ka jingïalang ngi la pynpaw ïa ki jingshisha ba ngi la ïoh bun ki jinghikai bad ngi da burom shisha ïa ka jinglong sngewrit, ka jinglong rangbah bad iar jingmut kum u nongïalam, ka jingsbun bad khamtam eh ka jingieit jongu ïa ki paidbah bad kumno u kwah ban kyntiew shisha ïa ka kam jngohkai ha ka jylla ïa kaba la pruid dak lut ha ka jingthaw ïa ka Riti Pynïaid kam jongka Forum” ong ka kyrwoh na u General Secretary bah Ian Khongmen..
U dei ma u ruh uba la ai jingmut ha kaba seng nongrim ïaka MTDF ban kynthup ïa ki dkhot ym tang kiba ïoh jingmyntoi ne kiba don bynta ha ka kam jngohkai hynrei na baroh ki bynta. Kata ka dei ka jinglong jongu kum u briew uba ïohi jngai kumno ba kane kan kyntiew ïa kane ka kam kumba la ïohi bad sakhi mynta. Ka jingjop jong ki Tamasa Synrai bad kumjuh ruh ban pynrung ïa ka jylla bad kane ka tahiñ hi ha ka Guinness Book of World Record naka bynta ka jingtem ksing kaba bun ngut tam ha pyrthei ka dei ka jingai jingmut bad jingïalam jongu hi. U briew uba pyni bad buh hakhmat da ki kam bad kaei ka jingïohi jngai jongu ka long ruh ha ka jingkyntiew ïa ki kam jngohkai ha ki thaiñ nongkyndong bad kawei na kita kadei ka Mawlynnong ha u 2004.
Na ka liang ka Meghalaya Joint Council of Trade Unions and Associations (MJCTU&A) ka la pynpaw ïa ka jingsngewkyndit bad ka jingsngewsih halor ka jingkhladnoh jong u Myntri barim ka Sorkar Jylla u Bah Robert Garnett Lyngdoh, uba long ruh u Vice Chancellor barim jong ka Martin Luther Christian University, Shillong.
Ka Assocation ha u kyrwoh ka la ong, u Bah RG Lyngdoh u long u nongïalam uba ïohi jngai bad u riewsaiñ pyrthei ba biang pura ka jingpyrkhat pyrdaiñ.
Kum u nongrwai bad kum u stadkot, u Bah RG Lyngdoh u dei uba ju pynïajan ïalade bad ki nongtrei nongbylla. Ha ka jingplie ïa ka 7th Biennial Conference jong ka MJCTU&A ha u snem 2014 u la kren halor ka jingsngewkhia jong u ïa ka imlang ka sahlang.
“U dei u nongïalam u bym kwah ban ïohi ba kan don ka jingïapait hapoh ka imlang ka sahlang ha ka kyrteng ka niam, ka dur ka dar, ka jingnget. U la long u nongïalam uba shisha. Ka jingkhladnoh jong u, ka la long ka jingduh kaba khraw,” ong ka Association ha u kyrwoh ba la phah sha ki lad pathai khubor.
Kane ka kynhun ki nongbylla ka la phah ruh ïa u kyrwoh sngewlem sha ka kurim, sha ki khun ki kti bad sha ki bahaing hasem jong u Bah Robert ba u Blei un pyntngen ïa ki ha kum kane ka jingjia kaba sngewsih.
Kumjuh ruh u Myntri ka tnad Sport bad Yourth Affairs bad Agriculture u bah Banteidor Lyngdoh u la pynpaw ka jingsngewlem halor ka jingkhlad noh jong u bah Robert Garnett Lyngdoh uba ju khot ieit da baroh Bah Bob. U la ong “ Ngi la duh ïa u nongïalam uba kat u nongïalam, u briew uba ïeng ha ka nongrim kaba skhem bad uba ym don ba lah ban pyndem wei ba u la rai. U dei u briew uba wanrah ïa ka jingshongsuk shongsaiñ ha ka jylla. Ngi la ïatrei lang ha kiba bun ki bynta khamtam ha ka liang ka sport bad nga shem ba u long u briew uba sngewrit, uba ïar ka jingmut jingpyrkhat bad uba ïohi jngai ruh. Bun ki jingai jingmut jongu kim ju long lehnohei. Ha ka liang ka saiñ pyrthei u dei uwei na ki nongïalam uba khuid bad suba u bym don ka jingthoh bria bad u bym ju bam sap. U dei u briew uba isih ïa ka jingbamsap. Ngin ym ïoh shuh ïa kum une u nongïalam. Ka jingkhlad noh jongu ka la long da shisha ka jingduh kaba khraw tam ïa ka jylla, ïa ki khun ki kti, ïa ka ïing ka sem khamtam ïa i kong Ampareen bad kiwei ki para kiba dang donkam bha ïa ka jingïalam bad ai buit ai bor jongu ha ka saiñ pyrthei. Nga phah ïa kane ka khubor sngewlem sha phi baroh kiba don ka jingïadei bad nga duwai ruh ba U Blei un ai ka jaka shongthait kaba junom ïa ka mynsiem jong I bah R. G Lyngdoh.
