Shillong, Risaw 08: Ka Seng KSU ka pynrem jur ïa ka jingpyrshang jong u Myntri ka tnad Kam Pohïing ban pynïasnoh ïa ka rally jong ka KSU kaba la long ha ka 19 tarik Nailar bad ki kam lum pisa be-aiñ jong ki pulit kiba hap hapoh ka jingpeit bad jingkhmih jong u lyngba ki lad pathai khubor ba u la kren ha ka 6 tarik u Risaw 2026.
Ki san tylli ki mat kiba ka KSU ka dawa na ka Sorkar, ki dei kiba shong nongrim, na bynta ka bit ba biang ka jaitbynriew. Ka jinglum pisa be-aiñ ne ka jinglong bakla jong ki pulit bad ka jingïakhih paidbah jong ka KSU ki dei ki mat kiba ïapher.
Ka jingïasnoh ïa kine baroh kam pynjah ïa ki jingkylli kiba paidbah ki buh ïa ka tnad Kam Pohïing, hynrei ka pyni tang ïa ka jinglong khynnah ka jong u kum u nongmihkhmat paidbah ban da rapjot.
“Ka KSU ka la pynkynmaw ïa kaei kaba u Bah Prestone u ong hikai shwa ban kren da pyrkhat shispah sien. Lym kumta, ki kyntien kiba la thmu ban ïada ïa ki ba don kti bad ïa phi ki lah ban wanphai biang bad ktah ïa phi kham jur ban ïa ka jingkylli kaba phi pyrshang ban phet na ka,” ong ka kyrwoh na u Assistant General Secretary ka seng u Samla Pynshai Kupar M Dkhar information bad Publicity Secretary KSU CEC.
U la ong ba lada ka tnad Kam Pohïing kala poi haduh u pud ba kam lah shuh ban pynbeit ne ban ai jubab shai halor ka jingleh jong ki briew kiba hap hapoh ka jingpeit jong ka, te ka jingkylli kaba paidbah ki dei ban buh kam dei shuh “Mano kita ki nongpynkulmar ha ka rally jong ka KSU?” hynrei “Mano hi u nongpeit bad nongkitkhlieh ïa ka tnad Kam Pohïing.
Ka KSU ka ong ba bad lada ka jingïalam ïa ka tnad Kam Pohïing ka la long kaba eh palat, ka don ka lynti kaba don burom, kata da kaba hiar noh na ka Shuki.
Ka KSU kan ym shah pynphai lynti haba la don bad ïohi paidbah ki pulit ki la lum pisa be-aiñ, te to tohkit mano ba la ai jingbit, tohkit mano ba la ïoh jingmyntoi, bad shim ïa ka sienjam katkum ka aiñ, ong u Pynshai Kupar M Dkhar information bad Publicity Secretary KSU CEC.
