Ym dei ban shu beh ïa ki sha surok hynrei da ka jaka kaba biang yn ai ïa ki nongdie madan: Dhar, Dy.CM

Shillong, Risaw 08 : Ka Sorkar Jylla kan ym pynkynriah ne beh noh ïa ki nongdie madan sha surok, hynrei ka dang wad ïa ki jaka kiba biang ban buh ïa ki, khnang ba kin lah ban trei bad kamai bha, la ong u Symbud Myntri Rangbah ba peit ïa ka tnat Urban Affairs, Bah Sniawbhalang Dhar.
U la ong ba ka Sorkar ka dang trei na ka bynta ka jingmyntoi jong ki paidbah bad kan shim ïa ki sienjam kiba donkam ha kane ka bynta.
“Ngim duh jingkyrmen, ngi dang trei tang na ka bynta ki paidbah. Ngam lah ban ïathuh ïa phi mynta ïa kaei kaba ngan leh, hynrei ngan leh ïa kaba donkam,” u la ong.
U Bah Dhar u la ong ba ka jingpynkynriah ïa ki nongdie madan ha Khyndai Lad bad Laitumkhrah ka la dep, hynrei ïa kiwei pat ki jaka yn sa shim sienjam hadien ba la lap ïa ki jaka kiba biang.
“Ki dei ki khun jong ngi hi shynrang bad ki kynthei bad kumta ngim lah ban shu beh noh ïa ki,” u la ong.
U la pynshai ba ka daw jong ka jingpynslem ka long namar ka Sorkar ka hap ban ïoh ïa ka jaka kaba biang shwa.
“Nga hap ban buh ïa ki ha ka jaka kaba dei. Ki dei ki briew jong ngi hi, ngim lah ban shu phah noh ïa ki sha surok,” u la ong.
U la ong ba ka Sorkar ka thmu ruh ban pyntreikam ïa kajuh ka rukom kaba la pyndonkam ha Khyndai Lad bad Laitumkhrah ha kiwei pat ki jaka, kynthup ïa ka GS Road.
“Don bun tylli ki jaka, hynrei ngim pat dep rai. Ngi hap ban peit lada ka jaka kan long kaba bha ne em na ka bynta ka kamai kajih jong ki,” u la bynrap.
Haba kylli halor ka Polo Market, u Bah Dhar u la ong ba ka jingai bynta ïa ka jaka la dep bad la pynbeit ruh ïa ki kyndon.