Da ki nongkitkam bathymmai pynkhlaiñ ka NPP ïa ka tnad treikam ha Shillong South constituency

Shillong Risaw 08: Ka National Peoples Party ha ka sngi palei ka la pynskhem ïa ki nongkitkam kiba thymmai na ka bynta ban pynkhlain ïa ka jingtreikam ha Shillong South Constituency kaba la tip kum ka NPP South Shillong Block Unit hapoh ka jingïalam ka President ka Kong Venetia Mawlong bad u General Secretary u Bah Mebankmen Kharkongor.
Ïa kine ki nongïalam bad ïa ki 44 ngut ki dkhot jong ka NPP South Shillong Block Unit la pynskhem da u President ka NPP Shillong City u Bah Arnold Lanong ryngkat ka jingdonlang u Nongïalam ka NPP u Bah Donkupar War, u President ka NPYF Shillong City u Bah Mayborn Rapthap, ka Kong Damelary Ryntathiang ka President jongka NPWF East Khasi Hills bad kiwei kiwei.
Na ka liang ka party ha kane ka sngi ki la kitbok kitrwiang ïa ki nongïalam bad ïa ki dkhot jong ka NPP South Shillong bad ki la kyntu ïa ki ba watla kane ka seng kam don satia ïa kino kino ki nongmihkhmat paitbah na kane ka Constituency, hynrei kin bteng pat ban trei shitom na ka bynta ban pynkhlain khantam eh ban trei met bad mynsiem ban pynthikna ba u kyrtong ka NPP ha ka elekhon shiteng samoi jongka MP Lok Sabha u Dr DRL Nonglait un jop burom ïa kane ka elekshon.
Nalor kane, kila kyntu ruh ba kidei ban leit pynsngewthuh ïa ki paitbah halor ki kam kiba ka NPP kala leh na ka bynta ka roi ka par jong ka jylla bad khamtam ban ïalap sha ki paitbah katei ka Constituency ba kim dei ban ngeit ne ngop ha ki khubor lamler kiba la pynsaphriang thok pyrshah ïa ka seng NPP.
Kiwei pat ki nongkitkam ki kynthup ïa u Working President bad u Treasurer Bah Emelan Kharumlong, u Vice President u Pratik Gurung bad kiwei kiwei ki nongkitkam.
Ki nongkren ha ka jingïalang kila kitbok kitrwiang ïa kane kynhun kaba thymmai ba kan trei shitom na ka bynta ban pynkhlain ïa ka seng NPP bad khantam ha kaban pynthikna ba u kyrtong MP jong ka party u Dr DRL Nonglait un jop burom ïa kane ka elekshon.