S P L 2026 : Pynim ka Sawmer ïa ka jingkyrmen ban ïohrung sha ka Super Cup da kaba pynliem ïa ka Mylliem

Shillong, Risaw 08: Ka Sawmer ka la wanphai na ka shi kol ban pynliem da 2-1 ïa ka Mylliem ha ka jingïakhun kaba la long kum ka phainal na ka bynta baroh arliang ha ka lympung Shillong Premier League 2026, hynne ka sngi Palei ha SSA Stadium.
Watla u Daohipaia Rymbai (45′) u la pynkhihjar nyngkong ban buh hakhmat ïa ka Mylliem, ka jingïalehkai kam shym la kut ha ka jingkmen ïa ka kynhun naba ka Sawmer ka la wanphai da kaba tyngeh ha ka kylla miet ban thep ar tylli ki kol lyngba u Banteilang Lyngdoh (77’) bad u Bickyson Kharkongor (81’).
Da kane ka namjop, ka Sawmer (12 point) ka la kiew na ka kyrdan ba hynñiew sha ka kyrdan ba san ha ka miej, kaba buh ïa ki ha ka jingkyrmen ban ïohrung sha ka SSA Super Cup, ka ban sa long shen hadien ka SPL. Tang ki kynhun ba pyndep ha ka thup Top 6 ha ka SPL ki lah ban shim bynta ha ka Super Cup, ha kaba ka Sawmer kan dang hap ban ap ïa ki resol jong ki jingïalehkai kiba dang sah ban tip la ki ïohrung ne em, namar ka Meghalaya Police (11 point) bad ka Rangdajied United (10 point) ki dang ïoh ka lad ban weng ïa ka (sawmer) na ka thup Top 6.
Katba ka Mylliem ka la pynkut ïa ka samoi ïalehkai jong ka sha trai duh jong ka miej, da kaba khur tang shi point na kawei ka jingïakhaid bad shah rem haduh 8 sien. Kane ka dei ka sien kaba lai ba ki la shah rem wat hadien ba ki la lamkhmat nyngkong ïa ka jingïakhun bad kan hiar sha ka First Division ha ka samoi ban wan.
Mynta ka sngi ka Meghalaya Police kan aireng pyrshah ïa ka Laitkor ha ka por 3 baje nohphai sngi. Jia ryngkat, ka result hynne ka sngi Palei ka la pynthikna ruh ba ka Laitkor, kaba don ha ka kyrdan kaba khyndai kan shah pynhiar kyrdan noh na ka SPL. Watla katta, ka dang ïohlad ban ïaryngkat point bad ka Nangkiew Irat (9 poiñ) lada ka lah ban pynliem ïa ka MLP mynta ka sngi, hynrei ka Nangkiew Irat ka don ïa ka rekod jingjop hadien ba ka la pynliem ïa ka Laitkor ha ka 25 tarik Nailar.