SSA 1st Div’n: Pynthikna ka Mawkhar ïa ka jaka ha ka semi final da kaba pyndep ha khlieh duh ka Group B

SHILLONG, Risaw 08: Ki jingïalehkai group stage jong ka Shillong Sports Association First Division 2026 ki la poi sha kaba kut hynne ka sngi Palei, ha kaba ka Mawkhar SC ka la pynkut ïa ka jingïakhun ha khlieh duh jong ka Group B. Kane la pynthikna hadien ba ka la pynliem noh da 3-0 ïa ka Ryntih SC ha ka jingïalehkai ba khatduh hynne ka sngi Palei ha MFA Ground.
Hadien ka jingïalehkai kaba khlem kol ha ka kylla step, ka Mawkhar ka la wanphai da kaba kham tyngeh ha ka kylla miet ban pynkhihjar lai sien lyngba u Pynshai Manik Kharbani (54’) Emanuel Rongrin (74’) bad u Donbok Sohtun (87’).
Ha kajuh ka por, ha SSA Stadium, ka Pohkseh SC ka la pynliem noh da 2-0 ïa ka Nongrim Hills SC. U Shining Nongdhar (35’) bad u Reinjoywell Wartdi (79’) ki la pynkhihjar mar shi sien ban pynthikna ïa ka jingjop.
Hadien ka jingpyndep ïa ka group stage, ka jingïapher ka long tang shi poiñ hapdeng ka kynhun kaba wan hakhlieh duh bad ki ar tylli ki klob ba bud nadien, hynrei ki ban ïohrung sha ka semi final ki long ka Mawkhar (8 point) bad ka Mylliem Lum FA (7 point).
Lah ban kdew ba ka Mylliem Lum FA bad ka Pohkseh ki ïaryngkat mar 7 point, hynrei ka Mylliem Lum FA ka don ïa ka rekod jingjop ha ka por ba ïakhun pyrshah ïa ka Pohkseh (ka jingjop kaba da 5-0 ha ka 19 tarik Naiur 2026).
Kumta ka jingïakhun jong ka Pohkseh ka la poi sha kaba kut mynta ka aïom. Katba ki ar tylli ki kynhun ba shah rem hynne ka sngi, ka Ryntih bad ka Nongrim Hills, kin dang hap ban ïakhun ha ki jingïalehkai Relegation Zone round robin ban lait na ka jingshah pynhiar kyrdan.
Baroh ar tylli ki semifinal kin long ha ka 15 tarik Risaw ha SSA Stadium. Ka Nongkrem kan aireng pyrshah ïa ka Mylliem Lum (Por 12:30 mynsngi) bud sa ka Mawkhar pyrshah ïa ka Malki (por 4 baje janmiet).
Katba ki jingïalehkai Relegation Zone kan sdang ha ka 13 tarik bad kan kut ha ka 19 tarik Risaw, ha kaba ki saw tylli ki kynhun (Laitkyrhong, Mawtawar, Ryntih bad ka Nongrim Hills) kin ïakynduh pyrshah mar shi sien kawei ïa kawei pat ban rai mano ban shah pynhiar kyrdan sha ka Second Division.