Ha baroh ki 7 tylli ki district : Ym dei ban pynrung ïa ka ktien Garo ha ki District Selection Committee, pynpaw ka HNYM ha u Lat

Shillong, Risaw 06: Ka seng Hynñiewtrep National Youth Movement (HNYM) kila leit ban ïakynduh ïa u Lat ka jylla u C.H. Vijayashankar ban ai ïa ka jingthoh ban pyrshah ban pynrung ïa ka ktien Garo ha ki District Selection Examination ha ki hynñiew tylli ki Distrik.
Haba kren ha ki lad pathai khubor hadien ba la ïa kynduh ïa u Lat ka jylla u la ong ba kane ka jingwan ïa kynduh ka long ban ai ïa ka jingthoh ha kaba ïadei bad ka jingdawa ban pynrung ïa ka ktien Garo ha ki District Selection Examination, kaba mut ha ki exam thung kam kiba hap hapoh ka jingpeit jong ka District Selection Committee.
U Bah Louis Dohtdong u President ka HNYM u la ong ba na ka liang jong ka jaitbynriew Garo kila dawa ban pynrung ïa ka ktien Garo ha ki exam ba pynlong da ki District Selection Committee, u la ong ba ha Meghalaya ki don hynñiew tylli ki distrik, ka West Khasi Hills, ka South West Khasi Hills, ka Eastern West Khasi Hills, ka Ri Bhoi, ka East Jaiñtia Hills, ka West Jaiñtia Hills bad ka East Khasi Hills Distrik.
“Ka jingkwah ban pynrung ïa ka ktien Garo ka long khnang ba ma ki kin ïoh ban ïakhun ïa ka exam khnang ba kin ïoh kam ïoh jam bad ha kane ka jingïakynduh u Lat ka jylla u la shah shkor ïa ka jingpynsngew ka jong ki ba un shim khia ba kan nym don kano kano ka jingñiew shiliang khmat ïa ki trai ri trai muluk,” iathuh u Bah Dohtdong.
Haba ïadei bad kane u Lat u la kular ba un khot ïa u Advocate General ka jylla bad ki muktiar ba kin peit bniah ïa kane ka bynta, ha kajuh ka por u la ai jingmut ïa ka seng ba kan ïa kynduh ïa u Myntri Rangbah ka jylla bad ïa ki arngut ki symbud Myntri Rangbah ba phin sngewthuh ïa kaei ka jubab na ki.