La jot rathai bad sniew palat ka surok jong ka Mawsmai shaduh Shella, duna ka maramot

Shillong, Risaw 06: Ka Hynñiewtrep Integrated Territorial Organisation (H.I.T.O), East Khasi Hills, ryngkat ka jingdonlang ki Executive Committee (EC) Member jong ka Seng Kmie, ki Nongïalam bad ki Dkhot jong ka Sohra Circle ka la leit ban ai ïa ka Dorkhas sha u Assistant Executive Engineer, PWD (Roads), Sohra Sub-Division, halor ka jinglong sniew bad jingjot rathai jong ka Mawsmai-Shella Road.
Ka jinglong sniew jong katei ka surok ka la buh jingeh kaba khraw ïa ki paidbah kiba pyndonkam ïa kane ka surok man ka sngi. Ka jingduna ha ka jingmaramot bad ka jinglong bym bit jong ka surok ka lah ruh ban wanrah jingeh ha ka leit ka wan, ka kamai kajih bad ka jingïaid lynti jong ki paidbah bad khamtam ruh ïa ka jingma ïa ki paidbah.
Na ka liang H.I.T.O ka kren da kaba shai sha ka tnat PWD (Roads) ba kane ka kam, kam dei shuh ban pynslem bad dei ban shimkhia bad pynsted ïa ka jingmaramot ïa katei ka surok na ka bynta ka jingbit jingbiang, ka jingshngaiñ bad ka jingmyntoi jong ki paidbah.
Ka Seng ka la ai por tang shi taïew ïa ka tnat ba dei khmih ban sdang bad pynïaid noh ïa ka jingmaramot ïa katei ka surok.
Ka H.I.T.O kan buddien ïa kane ka kam bad kan dang ïai peitngor halor ka jingpyntreikam jong ka tnat PWD bad kyrmen ba ka tnat ba dei khmih kan shim ïa kane ka mat da ka jingshisha bad ka jingkitkhlieh, namar ka surok kaba bha ka long ka bynta kaba kongsan jong ka jingshakri ïa ki paidbah bad ka roi ka par jong ka thaiñ.