Shillong, Risaw 6: Ka tnad Commerce bad Industries jong ka sorkar Meghalaya kan pynlong ïa ka sien kaba ar ïa ka Reverse Buyer Seller Meet (RBSM 2.0) ha ka 8 bad 9 tarik u Risaw ha State Convention Centre, da ka jingthmu ban pynïasoh ïa ki Micro, Small bad Medium Enterprises (MSMEs) kiba wan na ka Jylla bad ki nongthied nabar ri.
Haba kren ha ki lad pathai khubor mynta ka sngi thohdieng, u Commissioner bad Secretary ka tnad Commerce and Industries u Bah C.V.D. Diengdoh, u la ïathuh ba ïa kane ka prokram la pynlong hapoh ka jingthmu jong ka Raising and Accelerating MSME Performance (RAMP) ryngkat ka jingïatreilang bad ka synjuk jong ki Federation of Indian Export Organisations (FIEO).
U la ong ba ka Meghalaya ka don haduh 98,000 tylli ki MSME kiba la register, bad ka RBSM kan ai ka rynsan na ka bynta ka jingïadei beit hapdeng ki kam khaïi (B2B) hapdeng ki karkhana trai ri bad ki nongthied ba la pynshisha na India bad nabar ri.
Katkum ka jingong jong katei ka tnad, kumba 22 ngut ki nongthied nabar ri kiba dei na ka ri kiba kynthup na Bangladesh, Canada, America, Uganda, Mauritius, Netherlands, Sri Lanka, Bhutan, United Kingdom bad Kenya ki la pynthikna ban iashim bynta, ha ryngkat ki nongthied napoh ri.
