Da ki jingthoh ha ki Banner bad Poster leit wah bad tah ka KSU kylleng ki jaka pyrshah ïa u SP EKH
Hadien ba khynra ïa ka jinglum pisa be-aiñ ki pulit ha Mawkhanu bad Thangshalai
Shillong, Risaw 3: Tang hadien katto katne sngi ba ka KSU ka la hiar khynra ïa ka jaka lum pisa beaiñ ki Pulit ha Mawkhanu bad Thangshalai jongka surok Shillong By Pass mynta pat ka la leit kylleng ki jaka ban wah bad tah da ki banner bad poster pyrshah ïa u SP jongka East Khasi Hills u bah Vivek Syiem.
Kitei ki banner kiba la wah da ka KSU ha ki jaka ba paw bha ka la buh ïa ki jingthoh kiba ka seng ka dawa ba dei ban kem bad pynshitom kat kum ka aiñ ïa ki pulit kiba donkti ha katei ka kam.
Ha kawei na ki banner ka KSU ka la buh jingkylli ïa ka jingïoh treikam jong u SP la bun bun snem mynta tang ha kane ka East Khasi Hills District. “U bah Vivek u la neh slem bha tang ha kajuh ka district sngewbha leit sha kiwei ki district ruh lane leit sha ri lum Garo ruh”.
Haba buh jingkylli pat ïa ka jingphah pynpra jong u SP ïa katei ka jaka ba lum pisa beaiñ ki pulit la thoh ha ka banner ” Nangno u SP u ïoh bor ban hukum pynpra ïa katei ka jaka beaiñ. Namar kat kum ki bor ka aiñ kane ka la dei ka jaka beaiñ bad ym lah ban shu phah pynpra kumto khlem da tohkit bniah.
Kaba kham khor na ki banner ka dei pyrpshah ïa u SP bad u Symbud Myntri Rangbah u bah Prestone Tynsong” Vivek Vivek hooid Forstone, dawa pisa beaiñ?, hooid Prestone, haei ka bhah jong nga hangne! hangne! hangne!.
Haba dawa ïa u SP ban kynriah noh sharud khnang ba ka jingtohkit kan long kaba hok, ka KSU ha kawei pat ka banner ka la thoh ” Pynshisha ba phim don ei ei ban leh bad katei ka kam bad ba phi long khuid phi long suba da kaba hiar noh na ka shuki SP bad ailad ba ka jingtohkit kan long kaba ïaid khlem leh shilliang khmat”.
Hakawei pat ka banner- ka KSU ka la thoh ba u SP Vivek Syiem u ïadonkti lym kumta kumno un shu matlah baroh kine ki por haba kiwei ki la dep sei madan bad mynta phi leh kyndit?
Ha kawei pat ka banner ka KSU ka dawa ban kem ïa ki pulit ophisar kiba donkti bamsap bad pynshitom ïa kiba bamsap kat kum ka aiñ.
Kane ka jingwah banner ka la jia hadien ba ka KSU ka la hiar khynra ïa ka jaka lum pisa ki pulit ha Mawkhanu bad Thangshalai ka mat kaba la pynkhie bitar ruh ïa kiba bun ha kane ka nongbah.