Shillong, Risaw 03: Ka sorkar Meghalaya ka la ïoh ïa ka jingpyntip na ka tnad Kam Pohïing ka sorkar pdeng ba ïa ka jingwan u Myntri Kam Pohïing, u Amit Shah sha Meghalaya la buh teng noh shwa.
Ha kane ka jingphah jingtip ym shym la ai kano kano ka daw hynrei la pyntip na ki daw ki bym lah kiar, katkum ka jingpynkhreh ban wan u Myntri Kam Pohïing ka sorkar pdeng sha Meghalaya ka long ba un wan ai ïa ka President’s Colour sha ka tnad pulit ka jylla Meghalaya.
Na ka liang ka sorkar jylla ka la pynkhreh ban don kane ka jinglehburom ha madan Polo bad na ka liang jong ki bor District Administration, la pynmih ruh ïa ka jingmaham ban nym pynher drone 3 km sawdong na katei ka jaka.
