Naduh 5 tarik yn sdang tohkit ka Special Committee halor ka jingkynnoh bam pisa ha kam thung Nurse ha Nongstoiñ

Shillong Risaw3: Ki samla kiba la ïakhun ïa ka jingpynrungkam Staff Nurse ha MCH Hospital, Nongstoin, kila shah ïawer ban aiti ïa kino kino ki sabut, ki jingpynshisha ne jingphla ha kaba ïadei bad kino kino ki jingleh ki bym dei, kynthup ïa ka jingkynnoh ïa ka jingpynbam pisa, ka jingpdiang ïa kano kano ka pisa be-aiñ, ka jingshah dawa pisa sha ka Inquiry Committee kaba kynthup ïa 2 ngut ki dkhot.
Ka committee kaba kynthup ïa u Executive Magistrate bad u Superintendent of Police ka West Khasi Hills, la thaw ban khmih bniah ïa ki jingkynnoh halor ka jinglong jingman kiba ïadei bad ka jingthungkam thungjam.
Ki samla kiba la shah jied ïa ka Interview bad kino kino kiba mad ïa ka jingshah kynnoh ba kila leh bym hok, hashwa ne hadien jong ka Interview, la bthah ban rekod ïa ka jingkren bad jingpynpaw ka jongki ne ban aiti ïa ka jingujor da ka jingthoh bad ki jingkyrshan da ki sabut.
Ka committee kan pdiang ïa ki sabut kiba kynthup ïa ki recording jong ka sur bad ka video, ki message bad ki jingtip kiba bniah kiba ïadei bad ka jingphah pisa, ne ïa kaei kaei kaba ki don.
ïa ki jingpynpaw bad ïa ki jingujor, yn rekod naduh ka 5 haduh ka 9 tarik, naduh ka por 10 baje mynstep haduh 4 janmiet ha ka Kamra ne Room No. 108, jong ka ophis treikam u Deputy Commissioner, West Khasi Hills District, Nongstoin.
Ka Inquiry Committee kala ong, ba kan buhrieh bad kan ym pynpaw pyrthei ïa ka jingphla jong ki samla kiba mih shakhmat ban ïada ïa ki na kano kano ka jingshah pyndik ne jingshah ban beiñ.
Ka committee kala kyntu ïa ki samla ba kin mih shakhmat bad ban ai jingtip, khnang ba kan lah ban ai jingïarap ïa kane ka jingtohkit bad ruh ban ïarap ha kaban lap la ïa katei ka rukom thungkam ka dei kaba la leh ne em ha ka lynti kaba khuid bad ka bym shah liang bad katkum ka jingwan shakhmat jong ki samla.