Pynsangeh kyndit U Myntri Kam Pohïing ka ri ban wan sha Shillong sangeh lut ki prokram

Shillong Risaw 3: Ka jingap khmih lynti ban pynlong ïa ka President’s Colour Presentation Ceremony na ka bynta ka Meghalaya Police, la hap ban pynsangeh noh shwa, hadien ba u Myntri Kam Pohïing ka ri u Amit Shah ula pynsangeh kyndit noh ïa ka jingthmu ban wan sha ka nongbah Shillong.
ïa kane ka jingïalang la buh tarik ban pynlong ha ka 5 tarik u Risaw ha JN Stadium, Shillong, ha kaba u Shah u dei ban long u Kongsan bad ban aiti ïa ka President’s Colour sha ki pulit ka jylla.
Ki tyllong khubor kila ong, ba katei ka jingpynsangeh u Shah ban wan sha ka jylla kala pynlong ban hap pynkynriah noh ïa katei ka prokram.
Haba pynthikna ïa kane, ka Meghalaya Police ha ka kyrwoh khubor ha ka sngi Saitjain, kala ong, “La pyntip ba ïa ka President’s Colour Presentation Ceremony ïa ki Meghalaya Police kaba dei ban long ha ka Lah Sngi U Blei , ha ka 5 tarik u Risaw ha J.N. Stadium, Shillong la pynsangeh noh namar ki daw ki bym lah kiar”.
Ka Tnad ka kyntu ïa baroh ki heh sorkar, ki ophisar bad ïa ki dkhot jong ki lad pathai khubor bad ia ki paitbah ban kynmaw ïa kane ka jingpynsangeh noh bad ka bynrap ba yn sa pynbna kham hadien ïa ka Tarik ban pynlong ïa katei ka prokram.