Wat kynthoh tang ïa ka Ri-Bhoi, kren ïa kiwei ki district ruh kiba la sdang shuwa

Nongpoh, Risaw 02: Ka Ri-Bhoi People’s Council (RBPC) ka la mih shakhmat ban pynshai halor ka jingkynthoh jong ka Seng Samla Mawlai Pyllun da ki kyntien kiba kham khor bad byrngem ha kaba ïadei bad ka jingdawa jong ka RBPC halor ka post Staff Nurse kaba la pynbna da ka ophis jong ka District Medical & Health Officer (DMHO), Ri-Bhoi District ba dei ban ailad shuwa ïaki samla na Ri-Bhoi namar ki don da ki spah ngut kiba bit ban trei ïaka kam.
Haba kren sha ki lad pathai khubor, u Bah Jayson Lennox Nongrum u la ong ba kumba ka Seng Samla Mawlai Pyllun ka don ka jingsngewkhia ïa ka lawei bad ka iohkam iohjam jong ki samla ka shnong, ka RBPC ruh ka don kajuh ka jingsngewkhia na ka bynta ki samla ka dong Ri-Bhoi.
U Bah Jayson la buh ïa ka jingkylli halor ka daw ba ka Seng Samla Mawlai Pyllun ka la mih shakhmat ban kynthoh ïa ka RBPC halor kane ka mat, haba ka jingdawa jong ka RBPC ka long ban ailad shuwa ïa ki samla trai Ri-Bhoi ha ki kam kiba lait ha ka district, khamtam haba don bun ngut ki samla na Ri-Bhoi kiba bit bad kiba biang ki jingdonkam ban aplai ïa katei ka kam.
U Bah Jayson u la buh ruh ka jingkylli balei ym don ka jingïakren kumjuh halor ka advertisement kaba la pynmih hashuwa da ka West Jaintia Hills District, ba ka jingkhot ka long tang na bynta ki trai shnong jong katei ka district, balei ka seng samla mawlai ka kwah ban kren tang ïaka Ri-Bhoi?
Haba pynshai shuh shuh halor ka nongrim jong ka RBPC, u la ong ba ka seng ka la shim ïa kane ka sienjam hadien ba ka la iohi ïa ki rukom pynmih advertisement ha kiwei pat ki district. Katkum ka jingong jong u, kane ka la pynkynmaw ïa ka seng ban buh ïa kajuh ka jingdawa na bynta ki samla na Ri-Bhoi.
U la ong ba ym don mano mano ba la mih shakhmat ban kynthoh halor katei ka advertisement na kiwei ki district, hynrei haba ka RBPC ka pynpaw ïa ka nongrim jong ka, la mih pat ki jingkynnoh ba ka seng ka thmu ban pynïapait ïa ka jingïatylli jong ki jaidbynriew.
“Hato ka jingieng na ka bynta ki samla ka long ka jingpynïapait?” la kylli u Bah Jayson, da kaba pynpaw ba katkum ka jingong jong u, ka jingthmu jong ka seng ka long ban ïeng na ka bynta ki samla bad ka hok jong ki ha ka liang ka iohkam iohjam.
U la bynrap ba ka Ri-Bhoi ka la long ka district kaba pdiang ïa ki briew na ki jaitbynriew bapher bapher, kynthup ïa ki Bhoi, War, Khynriam bad Pnar, bad ka RBPC kam don kano kano ka jingthmu ban pynlong ïa kane ka mat kum ka jingïakynad hapdeng ki jaitbynriew.
U Bah Jayson u la ong ba ka RBPC ka la mih shakhmat ban pynsangeh ïa ka eksam kaba la buh ban long ha ka 24 tarik Nailur, kaba la khot da ka ophis DMHO. Hadien kane, ka seng ka la leit ruh sha u Deputy Commissioner (DC), Ri-Bhoi, ban pynsngew ïa ka jingangnud bad ka nongrim jong ka.
Katkum ka jingong jong u, kane kam dei ka sien kaba nyngkong ba ka RBPC ka la kren halor kane ka mat, u la ong ba ha ki por ba la dep, ka seng ka ju pynpaw ïa ka jingdawa ba haba don ki kam kiba lait ha Ri-Bhoi, dei ban ailad shuwa ïa ki samla trai Ri-Bhoi.
Haba ïadei bad ka post Staff Nurse ha MCH Umsning Parila, u la pynpaw ïa ka jingsngewsih ba wat hadien ba la pynsngew ïa kane ka jingdawa sha ki bor pynïaid district bad ka ophis DMHO, kam shym la ïohi ïa ka jubab kumba la khmih lynti.
U la ong ruh ba ka RBPC ka peit ïa ki mat kiba ïadei bad ka bha ka miat jong ka dong Ri-Bhoi, kynthup ïa ka khyndew ka shyiap, ka riti dustur, ka ktien bad ka jingïohkam jong ki samla. Kumta, ka iohkam iohjam ka long kawei na ki mat ba kongsan kiba ka seng ka ju pynsngew.
U la pynpaw ba haba ka seng ka la iohi ïa ka advertisement jong ka Staff Nurse, ka la don ka jingkyrmen ba ki bor ba dei peit kin ailad ïa ki samla na Ri-Bhoi. Katkum ka jingong jong u, don da ki spah ngut ki samla na Ri-Bhoi kiba lah ban aplai bad kiba biang ki kyrdan pule na bynta katei ka kam.
Haba kdew halor ka jingmih shakhmat jong ka Seng Samla Mawlai Pyllun, u Bah Jayson u la ong ba ka seng ka sngewsih halor ki kyntien kiba la kren da ki nongïalam kiba kham khor bad long kumba byrngem bad u la ong ba ka RBPC ka kren tang halor kane ka mat bad kam pyrshang ban pynïar ïa ka sha kiwei pat ki ishu.
U la bynrap da kaba ong ba lada bud ïa kajuh ka rukom kaba la pynbna ha kiwei pat ki district, ha kaba la ailad ïa ki trai shnong jong kato ka district, ka jingdawa jong ka RBPC ka long ba ka Ri-Bhoi ruh ka dei ban ïoh ïa kajuh ka jingailad ïa ki samla trai district.