Da ka prokram pynkhuid shnong, rakhe ka Amlarem Sub-Division ïa ka jingdap 50 snem

Jowai, Risaw 02: Ha Amlarem mynta ka sngi la pynlong ïa ka jingpynkhuid shnong shi bynta na ka jingrakhe ïa ka jingdap 50 snem jong ka Sub-Division (Golden Jubilee) kaba ïatyngkhuh ruh bad ka jingrakhe ïa ka lyngkhuh sngikha u Mahatma Gandhi ne ka Mahatma Gandhi Jayanti bad ka Swachhata Hi Seva 2026.
Ha kane ka sngi la wan ban donlang da u ma Lahkmen Rymbui, uba dei u Myntri sorkar bad ruh u MLA jong ka thaiñ kum u kongsan ryngkat ka Vevotulo Kezo, ka SDO (Civil), Amlarem, ka kong D. Ksoo, SDO, PHE, u Dr. D. Lyngdoh, BDO, Amlarem C&RD Block, i Magistrate K. Rabh, ki sahep sorkar, ki Waheh Shnong, ki seng long kmie bad ki riew paidbah kila iashim bynta lang.
Ïa ka jingpynkhuid la leh ha ki bynta ïew jong ka Amlarem, ïa ki um ki wah, ki lynti syngkieng bad kiwei de ki bynta. Ha kane ka sngi la sam ruh ïa ki Dustbin sha ki katto katne ki shnong da kaba pynshlur ïa ki ban bud ïa ka rukum pynduh ïa ki jaboh.
U ma Lahkmen Rymbui haba ai jingkren ula ai khublei ïa ki ophisar, ki nongïalam shnong, ki kynhun longkmie bad ki riew paidbah kiba la wan sha kane ka prokram. Ula ïaroh ïa ka jingnoh synñiang jong ki kynhun jong ki seng longkmie bad ki Dorbar Shnong ban pynkhuid ïala ki jong ki jong ki jaka.
Haba pynpaw ïa ka jingitynnad jong ka mariang jong ka shnong Amlarem, u ma Lahkmen Rymbui ula kyntu ïa ki paidbah ba kin sumar khuid ïa ki ïing ki sem, ki ïew ki hat, ki surok, ki wah um bad ki sawdong sawkun. Ula ban jur ba ka jinglehkhuid ka long shi bynta jong ka jingim kaba manla ka sngi ym ban shu sahkut tang ha ki prokram ba kyrpang.
U ma Lahkmen Rymbui ula kyntu jur ïa ki nongshong shnong ba kin don ka jingkitkhlieh ban nym bret pathar ïa ki jaboh sha kino kino ki bynta, ula khot ruh ban don ka jingïatreilang bad ki bor sorkar ban pynïoh ïa ka jaka bret ñuit kaba biang eh.
Shuh shuh ula pynsngew haduh kumba 20 tylli ki shnong hapoh ka thaiñ Amlarem kin ïoh ïa ki kali ki ban leit lum ïa ki jaboh jabaiñ bad ban leit bret ïa ki sha ki jaka theh ñiut. Ula pyntip ruh ba ka tnat Public Health Engineering (PHE) kala dep pynkhreh ïaka Estimate kaba palat ?15 klur tyngka na ka bynta ban pynïoh umbam umdih ha katei ka thaiñ Amlarem.