Nongstoiñ, Risaw 02: Halor ka jingjia ba sngewsih ha Domkyrkoh kaba hap ha Rambrai Jyrngam kaba la jia ha kine ki khyndiat sngi, ha kaba tang na ka daw ka jingbym biang ki surok, kawei ka longïing ka la hap ban duh noh ïa u khun ba dang rit namar kat ban poi sha ka jaka sumar u la khlad noh.
Halor kane na ka liang ka seng Voice of the Proples Party West Khasi Hills hapoh ka jingïalam jong u Bah Robert Wahlang, ha ka thohdieng ka la leit ban jngoh bad poi hi dalade shaduh ka shnong Domkyrkoh ban leit jngoh ïa ka longïing kaba la mad ïa ka jingsngewsih na ka jingjia khlad noh u heprit shiteng lynti khlem poi jaka sumar.
Ha kane ka jingleit ki nongïalam bad nongkyrshan ka VPP la don bad pdiang ruh da u nongïalam jong ka shnong. Katba na ka liang u Bah Robert Wahlang haba ai jingkren u la ong ba kaei kaba la ïohi ha kine ki sngi ïa kaei kaba la dep jia, ka long kaei kaei kaba sngewsih haduh katta katta bad kaba pynkyndit.
U la ong ba kum kine ki jingjia ki long kiba sngewsih haduh katta ïa ka jaidbynriew, haba wat ha kane ka juk kaba lah shai bad kaba ym da kham don shuh kum kine ki jingeh. Hynrei, dang ïohi ïa kaba kum kane mynta sha kane ka thaiñ.
U la ong ba kane ka kam hap ban kynnoh beit ïa ka sorkar namar ka la klet bad leh meinah shisha ïa ki nongkyndong kiba don ha kylleng ka West Khasi Hills District. Kane ka long naduh ki por kiba la dep ha kaba kawei ka sorkar hadien kawei pat, ym shym la don ban peit ban jngoh na ka bynta ki nongkyndong ha ka jylla.
Nalor nangta ruh ki nongmihkhmat uwei hadien uwei pat bad na ka por sha ka por, ki pynpaw ïalade ba ki kwah ban kyntiew ïa ka roi ka par bad ban wanrah ïa ki surok kali bad baroh kin ïoh ïa kajuh ka hok. Hynrei kine kine baroh kiba paw mynta ki pynpaw pynban ba kata ka hok jong ki nongshong shnong kam don satia.
Ngi wan hangne ban ïakynduh ïa kane ka longïing longsem kaba la mad ïa kane ka jingjia ba kthang ha ka jingim jong ki. Ngi phah ruh ïa u kyrwoh sngewlem ba u Blei un don ryngkat ba watla la hap ban mad ïa kane ka jingsngewsih, hynrei un don ryngkat ban pyntngen ïa ka mynsiem jong ki”, ong u Bah Robert Wahlang.
U la bynrap ruh, “Ka kyrwoh kaba ngi phah sha ka sorkar ka long wat kut tang ha ki jingpynbiej paidbah, hynrei leh ïa ka kam kumba ka ju ong bad pyrta baroh shikatta”.
