Ïashimbyntalang ha ka jingpynkhuid ïa ka Iawmusiang, shibynta na ka Swacchata Hi Seva campaign

Jowai, Risaw 02: Mynta ka sngi ka Jowai Municipal Board (JMB), Jowai ka la pynlong ïa ka jingpynkhuid ïa ki bynta jong ka Iawmusiang kiba kynthup ïa ki ïew jong ka CNI bad ïew Seinraij, kaba dei shi bynta na ka Swacchata Hi Seva campaign hapoh ka phang “Swachhata Mein Sahbhag, Swachh Bharat, Viksit Bharat”.
Haba ai jingkren ha shwa ban pynlong ïa ka jingïapynkhuid ka kong D.V. Lyngdoh, ADC bad CEO ka JMB kala batai shaphang ka Swachhata Hi Seva bad ka jingdonkam jong ka jingïasnohkti lang ban wanrah ïa ka jingkhuid jingsuba. Ka la ïathuh ruh ba ka jingïalap shaphang kane kala sdang naduh ka 17 tarik u Nailur bad kan kut haduh ka 17 tarik u Risa 2026, kaba pynleit jingmut ban wanrah ïa ka jingkhuid ha ki jaka ïew, ki jaka jngohkai pyrthei bad ha kiwei de ki jaka paidbah.
Ka kong Lyngdoh kala batai ruh shaphng ka Solid Waste Management 2026 kaba batai shaphang kumno ban tip ban pynïakhlad ïa ki jaboh bad buh ïa ki ha la ki jong ki jong ki jaka bret ñuit (Bins). Kala ïathuh ruh ba ka JMB kala jied ïa ki jaka bapher bapher ban leit pynkhuid kaba shi bynta na ka jingïalap shaphang ka jingkhuid bad ka jingtip ïa ka rukom pynlong ïa ki jaboh.
La ïoh ruh ïa ka jingkren na u ma P. Lyngdoh uba dei u Chairman ka JMB, u Daloi ka Elaka Jowai u ma Puramon Kynjing.
La ïashim bynta lang ha kane ka jingpynkhuid da u Waheh Shnong ka Tympang Iawmusiang bad kiwei ki dong jong ka nongbah Jowai, kumjuh ki khynnah Scouts bad Guides, ki nongshong dukan kiba don ha Tympang Iawmusiang, CNI bad ïew Sein Raij.
Nalor ka jingpynkhuid ïa ka Iawmusiang baroh ki dong bad shnong kiba don ha Jowai ki la ïamih ban pynkhuid ïa la ki jong ki jong ki shnong ki thaw jong ki.