Nongstoiñ, Risaw 02: Uwei u samla na ka shnong Upper New Nongstoiñ u la ïoh ban plie paidbah ïa kawei ka dukan jong u kaba lah ruh ban ong ba ka dukan kaba kham pher tam na baroh, namar ha katei ka dukan la die ïa ki tiar siat kum ki suloi air gun bad kiwei kiwei kiba u la ïoh laisen ban die. Ka kyrteng ruh jong katei ka dukan kum ka M/s Ban M Lyngdoh Arms and Ammunition Dealership.
Ïa katei ka dukan la dep ban plie paidbah da ka Cheysian N Sangma Assistant Deputy Commissioner kum ka kongsan, ha ryngkat ka jingïadonlang u bah Mawlieh napoh ka tnad Fire and Emergency Service, u bah A.L Syiem Secretary ka Hima Nongstoiñ, u Bah J.K Diengdoh Sordar ka Shnong Upper New Nongstoiñ, ki riew rangbah ka shnong Upper New Nongstoiñ bad kiwei kiwei.
Na ka liang jong u bah J.K Diengdoh Sordar ka Shnong Upper New Nongstoiñ, haba ai jingkren ha katei ka jingïalang u la ong ba kiba kum kine ki tiar kiba ïoh na katei ka dukan jong u Samla Ban M Lyngdoh, ki dei shibynta jong ka sports bad ruh ki jingpynbyrngia ïalade.
Hynrei, u la kyntu ruh ba un husiar bad ba um dei bah shah ïalam bakla, namar ki tiar ki dei kiba lah ban mynsaw bad ba ïatyngkhuh ruh bad ka aiñ, hynrei u dei ban pyndonkam bad pynbiang katkum ki kyndon aiñ ba la bthah ïa u.
Katba na ka liang jong u bah A.L Syiem, Secretary ka Hima Nongstoiñ haba ai jingkren u la ong ba lada peit ïa ki tiar jong u kum ki Air Gun, ki dei ki tiar kiba la kham klaiñ ym shuh kum kiba mynshwa. Kumta haba die sha ki briew dei ban da bthah bha ba kine ki tiar ki lah ruh ban wanrah ki jingmynsaw lada ym pyndonkam bha ha ka rukom kaba dei.
Ka kongsan pat ka la kyntu ïa utei u samla ba u dei ban bud ryntih ïa ki kyndon aiñ haba die lane pyndonkam ïa kitei ki tiar. Dei run ban buh jingthoh ïa ki nongwan thied nangta bad ïatreilang bad ki bor jong ka aiñ ruh. Na ka liang ka kongsan ka la kitbok kit rwiang ruh ïa u tei u samla ba un nang kiew shakhmat ha ki kam ba bha baroh.
