Nongstoiñ, Risaw 02: U runar ba triem u ba la tip kyrteng u Banphrangkupar Nongbri u la shah rai pynrem ha ka ïingbishar ha kaba u hap ban shong phatok shi jingim. Kane ka rai jong ka ïingbishar jong ka District & Session Judge West Khasi Hills District, Nongstoiñ ka la mih ha ka 30 tarik u Nailur 2026.
Ha ka jingpyllait khubor mynta ka sngi lyngba ki lad pathai khubor, u Superintendent of Police West Khasi Hills, u la pyntip ba ka jingrai pynrem da kaba set phatok shi jingim ïa une u runar, ka dei namar ka kam pynïap briew ba shyrkhei kaba la jia ha ka miet jong ka 23 tarik u Nailar 2021 ha ka shnong Nongstoiñ. Iwei na kiba la shah pynïap I dei I ba la 79 snem ka karta bad iwei pat I dei I nongtrei ïing I ba dang 25 sneme ka karta.
Haba ïathuh bniah, na ka liang u SP u la ong ba ha ka step 24 tarik Nailar 2021, hadien ba ki pulit jong ka Nongstoiñ ki la ïoh jingtip ryngkat ka ejahar, mar mar ki leit sha katei ka ïing ha ka por 10:20 mynstep bad haba pynpait ïa ka tala bad rung shapoh ïing, la lap ïa ka metïap jong ka longkmie ba 79 snem lem bad ka khynnah trei ïing kaba 25 snem ha ka kamra thiah jong ka, kiba la thiah lyngktar bad ka rukom pynïap ruh kaba da I triem shisha.
Hadien kane ka register ïa ka case katkum ka Nongstoiñ P.S. Case No. 54(08)2021 under Sections 302/34 IPC. La thung ïa ka jingtohkit hapoh ka jingïalang ka WPSI D.P. Nongbri. Hapdeng ka jingtohkit la lap ba u runar u ba la leh ïa katei ka kam ba shyrkhei la tip kum u Banphrangkupar Nongbri bad ym slem la ïoh ban kem noh ïa u.
Shuh shuh, hadien ba la dep ban tohkit ha ryngkat baroh ki sakhi satar kiba biang, ka Investigating Officer ka la charge sheet pyrshah ïa une u runar katkum ka Section 302 jong the Indian Penal Code.
Dei tad haduh ka 30 tarik u Nailur 2026 pat ba ka District and Session Judge, West Khasi Hills District Nongstoiñ, hadien ba la dep ban bishar bnïah ïa baroh ki jingdonkam, ka la rai ban set phatok shi jingim ïa u Banphrangkupar Nongbri. U dei ban siew ruh ar lak tyngka katkum ka section U/S 302 IPC.
