Shillong, Risaw 02 : Ka State Disaster Response Force (SDRF) mynta ka sngi ka la ïarap ban sei ïa ka metïap jong uwei u samla uba la lap ha kawei ka ïing ha Khyndailad (Police Bazaar).
Katkum ka kyrwoh la ïathuh ba hadien ba la ïoh jingtip shaphang kane ka jingjia na ka District Disaster Management Authority (DDMA), East Khasi Hills, ki dkhot jong ka 1st SDRF Battalion, kaba don ha Mawdiangdiang, Shillong, ki la leit mar-mar sha katei ka jaka ha ka por 10:45 baje mynstep bad poi ha katei ka jaka ha ka por 11:20 baje mynstep.
Hadien ka jingpeit bniah, ka kynhun jong ka SDRF ki la pynhiar noh ïa ka metïap da kaba pyndonkam da ki tyllai bad pynhiar suki ïa ka sha madan. Hadien kata, la aiti ïa ka metïap sha ki pulit kiba don ha katei ka jaka na ka bynta ban leh ïa ki kam kiba donkam.
Katkum ka jingtip ba la ïoh na ka SDRF, la lap ba utei u briew uba ïap u dei uba tip kyrteng kum u Sajan Barman, u ba don ha ka rta kaba 18–19 snem bad uba shong basah ha Bendal, Borsora.
Kane ka long katkum ka kyrwoh ba la phah da u Bah PH Shylla, Senior Staff Officer bad PRO, Directorate of Civil Defence & Home Guards, Meghalaya, Shillong.
