Mairang, Risaw 02: Na ka bynta ban ai mynsiem ïa ki samla kiba don ïa ki sap bad ki talent bapher bapher ka ophis jong ka District Sport Officer West Khasi Hills ha ryngkat ka jingïatreilang bad ka ophis jong ka Deputy Commissioner Eastern West Khasi hills ka la pynlong ïa ka District Level Chief Minister Youth Engagement Programe kaba ar sngi ha kaba ki samla na kylleng ki shnong napoh ka district ki la wan ban ïashim bynta bad pyni ïa ki sap ba ki don.
Ïa katei ka programe la pynlong ha Tirotsingh Memorial hall Pyndengumïong kaba la sdang ha ka 29 tarik Nailur bad la pynkut noh ha ka 30 tarik Nailur. Ki bynta kiba la pynlong ha katei ka prokram ki kynthup ïa ka jingïakop tan tyllai, airong, thoh jingïathuh khana, ka jingïakop pyninam ïa ki tiar shna saïan & technology, ka jingïakop declamation, ka jingïakop kyntip, ïakop shad, rwai bad kiwei kiwei.
Ha ka sngi pynkut ïa katei ka prokram u bah G.W.Lyndoh Superintendent of Police Eastern West Khasi Hills u la long u kongsan bad u bah L. Myrthong Extra Assistant Commissioner Eastern West Khasi Hills district u la long u symbud kongsan.
U bah Lyngdoh haba ai jingkren kum u kongsan ha katei ka sngi u la ong ba ka jingpynlong ïa kiba kum kitei ki programe ka long kaba myntoi haduh katta katta ïa ki khynnah bad ki samla kiba don ïa ki sap ki talent ha la ki jong ki jong. Ha kajuh ka por u la ong ruh ka long ruh ka jingmyntoi kaba khraw ïa ki samla kiba ieit ïa ka kilan met namar ki hap ban pynlut ïa ka por ha kaba praktis ïa ki jingïalehkai ba bun jait ba ki sngew tynnad bad ka pynlong ruh ba kin ïoh ïa ka met kaba koit ba khiah bad ka jingmut jingpyrkhat kaba khuid.
Nalor kitei ki ophisar sorkar la wan ban ïadonlang ruh da u bah Bornard Syiemïong sordar shnong Pyndengumïong ki Principal jong ki skul kiba don ha Mairang, ki khynnah skul bad ki nongshong shnong. Ha katei ka sngi da ki spah ngut ki khynnah samla kiba la jop ïa ki jingïakop ha ki bynta bap her bapher naduh ki Block level, district level haduh state level ki la ïadon ryngkat bad ai mynsiem ruh ïa ki nongïashim bynta ha kitei ki prokram.
