SHILLONG, Risaw 02: Ka Nongthymmai SC ka la pynkhihjar ha ka khyllipmat ba khatduh ban pynliem da 1-0 kol ïa ka Laitkyrhong SC hynne ka sngi Thohdieng ha ka jingïakhun jong ka Group A ha ka lympung First Division 2026 jong ka Shillong Sports Association ha SSA Stadium.
Da kane ka namjop ka Nongthymmai ka la khur 6 point hadien lai tylli ki jingïakhun bad wan ha ka kyrdan ba ar, katba ka Laitkyrhong ka don hapdeng ha ka jingma, namar ka shong ha ka kyrdan ba saw da 3 point naki 4 tylli ki jingïalehkai. Tang ar tylli ki kynhun ba wan hakhmat eh na kawei pa kawei na kine ki ar tylli ki Group (A & B) kin ïohrung sha ka Semi final, katba ki ar tylli ki kynhun ba wan sha trai duh kin hap ban ïakhun ïa ki jingïalehkai Relegation Zone.
Haba phai sha ka jingïalehkai, ka jingïakhun ka la paw kumba kan poi sha ka jingïakhaid, ha kaba baroh arliang kim shym la lah satia ban thep kol. Hynrei kane ka kylla tad ynda la jam ha ki minit pynjlan shuwa ban kut, ha kaba u Arkibor Kshiar (90+4’) u la thep ïa ka namtam ban khur pura ïa ki lai point na ka bynta ka Nongthymmai.
Ka jingïalehkai SSA 1st Division 2026 ha kane ka sngi Saitjaiñ (03.10.2026) kan long hapdeng ka Mawkhar SC pyrshah ïa ka Mylliem SC ha ka Group B. Kane ka jingïalehkai kan long ha ka por 12:15 baje mynsngi.
