Pynpaw ki nongrep bad RS Shnongrim ïakaei kaba ki khmihlynti na ka Fact Finding Committee

Khliehriat nailur 30: Ki paidbah nongrep kiba na Shnongrim Elaka Nongkhlieh East Jaiñtia Hills Distric lem bad u Rangbah Shnong, Secretary Shnong, kiba la soi kyrteng ha ka jingthoh ba la buh hakhmat ka Fact Finding Committee bad ki la pynpaw shibun kiei kiei kiba ki khmihlynti na ka Fact Finding Committee ha kaba ïadei bad ka project tih mawshun jong ka company Shree Cement ha Lum Syrman ha elaka Nongkhlieh.
Katkum ka jingthoh ki la pynpaw da kaba ong “Ngi kyrpad da ka ba burom ïa ka Committee ban pynlong ïa ka jingtohkit kaba shisha ban lap ïa ki jingshisha, ym tang ban ñiew ïa kane ka mat kum ka jingïapher jingmut hapdeng kiba kyrshan bad kiba pyrshah ïa ka project jong ka Shree Cement. Ha ka jingshisha, kane ka long ka mat kaba ïadei bad ka jinglong trai ïa ka khyndew ha Lum Syrman,ka rukom treikam ka aiñ, ka jingleh jubor bad ka jingpynbeit shwa ïa ki jingeh jong kiba shah ktah hashwa ban pynlong ïa ka public hearing. Ngi kyrpad ïa ka Committee ban pynshisha ïa ka jinglong trai ïa ka khyndew, ban hok ki nongshong shnong kiba shah ktah, ka jinglong jong ka jingiapynbeit jaka (land settlement), ki jingjia ba jia ha ka Public Hearing ha ka 31 tarik u bnai naitung 2026, ka jingïuhroit roit ïa ka hok ki nongshong Shnong, ka jingai NOC halor ka jaka ki wei khlem ka jingmynjur ki trai jaka, ki rukom ïaid ki kam (proess) kaba la pynrung ïa ka jaka ki nongshong Shnong hapoh ka project”
Ki la dawa ruh ban pynlong ïa ka jingtohkit kaba laitluid bad kaba bniah halor ki jingjia ha ka 31 naitung 2026, ban ithuh ïa ka bor ba dei hok kaba la pynsangeh ne khang ïa ki briew kiba shah ktah ha ka Mining Project ban leit shimbynta ha Public Hearing, hato ka Public Hearing ka la ai ne em ïa ka lad kaba shisha bad ba laitluid ïa ki trai khyndew kiba shah ktah ba kin shimbynta bad ban pynpaw ïa ka sur jong ki bad jingeh jong ki ha ka public hearing, ban pynthikna ba ki jingeh halor ki hok jinglongtrai iaka khyndew la pynbeit ne em shuwa ban aiti bad pyndonkam ïa ka khyndew ki riew shimet na ka bynta ka project, ban pynthikna la ka don ne em ka jingiateh kular ban siew bailutsan namar ym dei ban shu ñiew kum kaba la biang lada ym pat pynshisha ïa ki briew kiba don hok halor ka khyndew ban ioh bad lada ym pat bud ïa ka rukom bad ki kyndon kiba katkum ka ain.
Ha ka jingthoh ki nongrep ba rep ba ju rep ha Lum Syrman ki la bynrap shuh shuh ba dei ban don ka jingtohkit kaba bniah ha kaba ïadei bad ka jingai NOC U Doloi Elaka Nongkhlieh, u Doloi Na-o Sukhlaiñ bad Waheh Shnong ka Shnong Lum Shyrngan, bah Rimi Shadap bad Secretary Shnong Lum Shyrngan, bah D Pakem, ban tohkit bniah bad pynshisha ba ka Lum Syrman kam dei ka Shnong ba shong briew hynrei ka dei jaka rep.
Ki nongshong Shnong jong ka Shnongrim kiba shah ktah kiba im ha ka rep ka riang bad ki ju rep ha Lum Syrman ki la pynpaw da kaba ong “Ngi don ki kot ki sla bad ki sakhi kiba ngi long kiba kloi ban pynmih ha khmat ka Committee, namarkata, ngim lah ban pdiang ïa ka rukom knieh jubor ne shim ia ka jaka jong ngi kum ka jaka kaba lait ban pyndonkam na ka bynta ka mining project jong ka Shree Cement Ltd. Ka jingpyrshah jong ngi kam dei tang ban pyrshah ïa ka jingtrei jong ka mining project, ngi pyrshah ruh ïa ka jingpyndonkam ïa ka khyndew jong ngi khlem da pynshisha, khlem kano kano ka jingia pynbeit shuwa ïa ki hok jong ngi halor katei ka khyndew.
Namarkata, ngi kyrpad da kaba burom bad da ka jingsngew skhem ïa ka Fact Finding Committee ban pynshisha ïa kiei kiei kiba la pynpaw, ban bishar ïa baroh ki jingthoh bad ban sngap ïa ki trai khyndew kiba shah ktah bad ka jingpyrshah jong ngi kan long tad haduh ba ia ki hok ha Lum Syrman yn lah ban pynbeit bad pynioh ha ki nongshong jong ka Shnong Shnongrim, ngi kum ki trai jaka bad ki nongrep ha Lum Syrman ngi pyntip ruh ha khmat jong ka Fact Finding Committee ba ka jing pyrshah jong ngi kam dei tang haka 31 tarik u naitung 2026 lane ka ka Public Hearing, hynrei ngi la pyrshah naduh ba sdang bad ngi ieng shkem ha ka nongrim kaba shisha ban pyrshah ïa kane ka Mining Project jongka Shree Cement Ltd kaba la thmu ban leh jubor ha ka jaka jong ngi bad ïa kane ka jingpyrshah ngi la la dep ujor bad ai jingtip ruh sha baroh ki tnat trei kam ka Sorkar Meghalaya kiba ïadei bad ka kane ka project kaba long beaiñ bad kaba shu iuh roit ïa ka hok ki trai jaka, ngi la ujor ruh hakhmat ka ïingbishar badonburom jong ka Meghalaya High Court ban ioh ka jingbishar kaba hok bad kaba khuid, ngi la dep buh ruh ïa ka dorkhas hakhmat u Myntri rangbah ka jylla, u Conrad K Sangma hakaba ïadei bad ka kane ka jingpyrshah jong ngi ïa kane ka project, hynrei haduh mynta halor kane ka jingpyntip ngi khlem pat ioh satia kano kano ka jubab”