Aiti ka JNC da ka dorkhas sha ka Fact-Finding Committee jong ka Sorkar Meghalaya

Shillong, Nailur 29: Ka Jaiñtia National Council (JNC), ka la aiti mynta ka sngi ïa ka dorkhas sha ka Fact-Finding Committee jong ka Sorkar Meghalaya halor ka project Lum Syrman ha East Jaiñtia, Lyngba kane ka dorkhas, ka JNC ka la kyrpad ïa ka Committee ban bishar bniah, laitluid bad da kaba pynshong nongrim ha ki sakhi kiba biang.
Ïa kane ka kynhun la ïalam da u President u Bah Sambormi Lyngdoh bad ha kane ka dorkhas, ka JNC ka la kdew ïa lai tylli ki mat ba kongsan kiba, katkum ka Council, ki donkam ïa ka jingbishar kaba kloi bad khlem shah liang jong ka Committee.
Nyngkong, halor ka jinglong trai ïa ka jaka bad ka jingïateh wai.Ka JNC ka la pynpaw ïa ka jingïapher hapdeng ka Final Environmental Impact Assessment (EIA) jong ka Shree Cement Limited, kaba ong ba la dep thied lut ïa ka jaka bad ba ka don hapoh ka jingbat jong ka kompani, bad ki jingkren ba la ïathuh ba u Dolloi bad u Secretary jong ka Elaka Nongkhlieh ki la pynpaw ha ka jingïalang bad ki lad pathai khubor ha ka 19 august 2026 kaba Katkum ki jingkren Jong ki ba la ai tang da ka wai ïa ka jaka, ym shym la die syndon ïa ka.Ka JNC ka la kyrpad ban pynshisha ïa ki jingïateh kular tynrai, ki jingthoh halor ka jingsiew, ki kyndon aiwai, ki hok jong ki trai jaka bad ki jingbit jingmynjur ba donkam katkum ka aiñ.
Kaba ar, halor ka NFLC kaba 652.24 hectare bad ka jaka tih maw kaba 217.394 hectare: Ka JNC ka la buh jingkylli halor ka jingïadei, katkum ki kot ki sla, hapdeng ka Non-Forest Land Certificate (NFLC) kaba 652.24 hectare, ba la kyrshan da ka map ba la survey lyngba ka GPS, bad ka jaka tih maw Lum Syrman Block-A kaba 217.394 hectare. Ka Council ka la pynpaw ïa ka jingsngewkhia ba ka jingpynrit ne jingpynïakhlad ïa ka jaka ka lah ban don ka jingktah ha ka jingbishar bad jingpeit bniah jong ki bor pynïaid kyndon ha ka kyrdan Central, ka seng ka Kynnoh ruh ba ka jingleh ia kane ka dei beit ban iaidlait naki aiñ ka central government. Kumta, ka la kyrpad ïa ka Committee ban peit bniah ïa ki kot tynrai, ki map ba la pynshisha, ki coordinates jong ka survey, ki jingthoh ha ki file bad ka rukom ai jingmynjur, khnang ban pynshai ïa ka jingshisha bad ka kyrdan jong kane ka kam katkum ka aiñ.Ka JNC ka la pynpaw shai ba kane ka dei ka jingsngewkhia kaba donkam ban pynshisha, ym ka jingpynbna ba la lap ïa ka jingpynkheiñ aiñ.
Kaba lai, halor ka jingthut jong ka public hearing: Ka JNC ka la kyrpad ïa ka jingtohkit kaba laitluid halor ki jingjia kiba ïadei bad ka public hearing kaba lah long ha ka 31July 2026. Kine ki kynthup ïa ka jingkawang maw ïa ki briew kiba thmu ban leit ïashim bynta, ka jingpynjulor ba la kynnoh ïa ki kali paidbah, ka jingpynjulor ia u surok PWD, bad ka jingpynsangeh ne jingkem shipor ba la ïathuh ïa ki dkhot ka JNC ha ka 30 july 2026. Ka Council ka la kyrpad ïa ka Committee ban tohkit jur ïa kine ki jingjia lyngba ki jingpynshisha jong ki sakhi bad ki kot ki sla sorkar, bad ban peit la ki paidbah ki la ïoh ban ïashim bynta laitluid ne em bad ha ka rukom kaba don jingmut.
Ka JNC ka la kyntu ïa ka Committee ban bishar ïa ki kot ki sla tynrai, ban sngap ïa ki trai jaka kiba shah ktah bad ïa ki Paidbah jong ka imlang sahlang, bad ban ai jingmut ïa ki bor ba dei peit ban shim ïa ki sienjam kiba donkam, lada ka jingtohkit ka pyni ba ka donkam.
Ka Council ka la pynpaw ba ka jingthmu jong kane ka dorkhas ka long ban tohkit bniah ïa ki jingshisha lyngba ka jingtohkit kaba laitluid, ym ban rai lypa ïa ka jingmih jong ka jingtohkit ne ban pynrem ïano iano ne ka bor pynïaid.Katkum ka seng hi, baka jingtreikam kaba shai, ka jingkitkhlieh bad ka jingïashim bynta kaba don jingmut jong ki paidbah ki long kiba donkam shwa ban ïaid shakhmat bad kino kino ki rai halor kane ka projek ba la thmu.