Yn sdang noh ban leit lum ki BLO ïa ki kot ki sla na ki thliew ïing: CEO

Shillong, Nailur 29 : U Chief Electoral Officer jong ka jylla u Dr BDR Tiwari u la ïathuh mynta ka Sngi Ba Ar ba kumba 90.65 % la dep shong bishar ïa ka Special Intensive Rivision (SIR) 2026 hapoh ka jylla bad u la bthah ïa ki bor ba dei peit ba kin pynsted ban pyndep ïa kiba dang sah ruh.
U Dr Tiwari u la shong jingïalang bad ki DC, ki District Election Officer, ERO, AERO bad kiwei kiwei ki ophisar lyngba ka video conference nalor u don ruh la ka jong pat ka jingïalang bad ki Seng Saiñ Pyrthei u la ïathuh ba na ki 21,69,243 ki nongthep vote kiba don ha ka Draft Electoral Roll kiba la hap ban ai jingthoh ne notice ki don 6,51,735 bad la dep sam sha ki 6n51,006 bad kiba dnag sah ne bym pat dep pynpoi ki don sa tang 619 tylli.
Na ka bynta kine la dep shong bishar haduh 5,90,784 sien bad la lap ba 910 tylli ki kyrteng ki dei kiba ym biang ki kot ki sla bad kiba ym lah ban ïoh thep vote ha ka jylla. Kiba ym donkam ban shong bishar bad kiba la dep pynrung ha ka draft electoral roll ki don 19,07,182 ngut ki nongthep vote shwa ban pynmih ïa ka electoral roll kaba khatduh.
Haba kren shaphang ka hukum ba la pynmih da ka Election Commission of India dang ha ka 26 tarik Nailur 2026 ba ïa kito kiba la phah jingthoh ha ka list No Mapping ki BLO ba dei peit ïa kito ki jaka ki dei ban leit mih sha ïing jong ki nongthep vote ban pan ïa ki kot ki sla ki sla kat kum ka jingdonkam bad pynrung ïa ki ha ka ECINET ban ïoh bishar ki ERO bad kitei ki nongthep vote kim donkam ban leit mih sha ki ophis jong ki ERO ne AERO ban shah bishar bniah.
U la ong lait noh tang lada ki ERO ki sngewdonkam ban khot ïa ki kin hap ban wan hynrei lada ym donkam lah ruh ban bishar lyngba ka online lane kita ki nongthep vote ki lah ban phah da kiba haïing hasem kiba la san ban leit mih na ka bynta jongki.
U la ong ïa kane ka hukum la pynmih ban pynkhlaiñ shuh shuh ïa ka jingbishar bniah lyngba ka online bad ban ïarap ïa ki nongthep vote kiba la ïaw ka rta lane kito kiba don jingduna dkhot met bad kito kiba shem jingeh ban leit mih sha ki ophis. ïa ki DEO la bthah ban buh ïa ki nongïarap, ban pynlong da ki jingïakynduh ba kyrpang na ka bynta kito kiba bylla sngi, kiba duk ba kyrduh, kiba shu sah ing trep, ki bym don ïing don sem bad kiwei kiwei kiba ïa kynduh jingeh ha ka jingim jongki namar kine ruh ki don ka hok ban ïoh rung ha ka electoral roll.
U la ïathuh ruh ba la ïoh pdiang 23,259 tyli ki aplikeshon ha kane ka jingleh ïa kane ka SIR kiba kynthup 12,624 ki form 6, 1616 ki form 7 1590 ki form 8 ban pynkynriah kyrteng bad 7429 ki form 8 ban pynbeit kyrteng.
Ha kaba ïadei bad ka jingïashim bynta ki seng saiñ pyrthei u la ïathuh ba ki don haduh 1814 ki Booth Level Agent kat 736 na ka NPP, 393 na ka BJP, 320 na ka VPP,186 na ka INC, 121 na ka UDP bad 58 ngut na ka AITC.
U la ong lada kito ki briew kiba dei hok ban ïoh thep vote kim paw kyrteng ha ka electoral roll ïoh ki shah ieh ha ka jingleh ïa ka SIR lane ki samla ne kiba dei ban ïoh thep vote nyngkong ki lah ban thep ïa ki kyrteng lyngba ki form ban ïoh pynrung kyrteng jongki. Kumta u la kyntu ïa baroh ki nongthep vote ba kin pynthikna ba ka kyrteng jongki ka paw ha ka Electoral Roll tang shu dep pynmih ïa ka namar wat lada don ka EPIC ruh kin ym lah ban thep vote lada ka kyrteng jongki kam paw ha ka electoral roll bad u la pynthikna ba baroh kiba dei hok ban ïoh thep vote kim dei ban duh ïa ka hok ka jongki.