Ha ka rta kaba 59 snem pynkhreh u rangbah ban pyndep ïa ka eksamin SSLC ha u bnai Nohprah

Shillong, Nailur 29: Ha ka rta kaba 59 snem, u Bah Sylvester Shadap u dang pynkhreh ban ïaleh ia ka eksamin SSLC- 37 snem hadien ba u la iehnoh shiteng ïa ka jingpule ha skul.
U Bah Shadap uba dei na ka shnong Thadrang Umngem na Ri Bhoi district, u dei uba la rangbah tam napdeng ki 9,767 ngut ki khynnah kiba la pep skul shipor kiba la pynrung kyrteng ban ïa khun ïa ka eksamin SSLC hapoh ka Meghalaya’s Second Chance Learning Programme.
U la sangeh ïa ka jingpule ha skul kadei ha u snem 1989 bad u la ngeit ba ka jingleit phai biang ka jong u sha ka jingpule kam long shuh kaba lah.
“Nga ieh noh shiteng por ia ka jingpue ha skul kadei ha u snem 1989, kumta ka la long kumba 37 snem naduh kata ka por.Hooid, nga tip hapoh jong nga ba ka jingwan biang na ka bynta ka jingpule kaba kham bniah ka la kut noh”, la ong u Shadap.
Mynta u la rai ban ïaleh ïa ka eksamin SSLC ka ban long ha u bnai Nohprah 2026, da kaba ong ba u kwah ban pyni nuksa ïa ki khynnah kiba ha ïing ha sem jong u bad ïa kiwei pat ki samla kiba la iehnoh ïa ka skul tang shiteng por.
“Ka jingwanphai biang na ka bynta ka eksamin SSLC ka long ban long ka nuksa ïa baroh ki samla, sdang na la ka jong ka ïing ka sem”, u la ong.
Ka jingpynkhreh ïa ka eksamin hadien jan sawphew snem ka don la ki jingeh.U Bah Shadap u la ong ba u shem jingeh ban pynïadei bad ki jingkylla ha ka rukom hikai bad ka jingsangeh kaba lah sllem ha ka jingpule jong u.
“Wat lada ka long kumne, ka thong ka long ba ngan trei shitom na ka bynta kane ka eksamin”, u la ong.
Ki 9,767 ngut ki candidate kiba la pynrung kyrteng hapoh kane ka prokram ki kynthup ïa ki khynnah samla, ki samla rangbah bad kiba la kham rangbah na baroh ki 12 tylli ki district jong ka jylla Meghalaya.Ym don ka jingbuh kyndon ïa ka rta kiba heh ban mih kum u private SSLC candidate.
Kane ka Second Chance Learning Prokram ka dei ka jingthmu lang jong ka sorkar Meghalaya, ka Meghalaya Board of School Education (MBOSE) bad ka Meghalaya Program for Adolescent Wellbeing, Empowerment and Resilience (MPOWER).
Ka ailad ïa ki khynnah kiba la pep skul shiteng por ban pynkhreh bad ban mih ha ka eksamin SSLC khlem da leit phai biang sha ka skul ba pura kaba ju long.
Ka prokram ka don 171 tylli ki jaka pule bad jaka bishar bniah ba la pyntip ha kylleng ka jylla.Ka Ri Bhoi ka don haduh 690 ngut kiba la pynrung kyrteng, katba ki nongpule kiba la pynrung kyrteng ha Mawlasnai centre ki long 185 ngut.
Ka lynti ka long na ka bynta ki briew kiba la iehnoh shiteng por ïa ka skul namar ka jingeh ha ka liang ka pisa tyngka, ki jingkitkhlieh ha ka longïing, ka jingwan buhai shnong, ka jingshongkha kloi, ki jingkhanglad ha ka jaka ne kiwei kiwei ki jingjia.
Ka eksamin kan sa long ha u bnai Nohprah kan ailad ïa u Bah Shadap bad ïa ki hajar ngut kiwei pat ki khynnah kiba la pep skul shiteng por ban pyndep ïa ka jingpule Class X jong ki bad ban bteng ïa ki jingpule kiba kham bniah, ki jinghikai ha ki kam ne ki lad kiba pynshong nongrim ha ki sap ki phong.