ha phatok bad 10 snem ïa uba thombor ïa ka longrynïeng ka khynnah ba duna jingmut jingpyrkhat

Shillong, Nailur 29 : Ka ïing Bishar kaba shong bishar kyrpang ïa ki kam beaiñ pyrshah ïa ki khynnah ne Special POCSO Court ka la rai pynrem ïa ki arngut ki runar kiba donkti ban leh beijot ïa ki khynnah rit.
ïa uwei u nongleh beijot uba kyrteng u Pyntngenlang Nongsiej ka ïing bishar jongka Nongbishar R Rymbai, East Khasi Hills ka la rai pynrem ïa u ha ka hukum kaba la pynmih ha ka 16 tarik Nailur ba un hap ban shong phatok haduh 20 snem namar ka jingdonkti ban leh beijot ïa uwei u khynnah rit ba dang 7 snem ka rta. ïa uwei pat uba kyrteng u Batskhem Diengsoh kane ka juh ka Nongbishar ka la rai pynrem bad hap ban shong phatok haduh 10 snem namar u donkti ban leh beijot ïa ka khynnah ba duna ka bor jingmut jingpyrkhat kaba dang 10 snem ka rta.
Kat kum ka jingpyllait khubor na u SP jongka East Khasi Hills u bah Vivek Syiem, la ïathuh ba kane ka jingjia ka la paw pyrthei ha ka 16 tarik Lber 2020 hadien ba ki kmie ki kpa ki la wan ban ujor ejahar (FIR) pyrshah ïa u Pyntngenlang Nongsien ba une u leh beijot ïa u khun jongki uba dang hynniew snem ka rta.
ïa kane ka ejahar la ujor ha Lumdiengjri Police Station bad ki pulit ki la rejister case kat kum ka Section 4/8 POCSO Act bad hadien kane la kem noh ïa u. Nangta la chargesheet ïa u kat kum ka section 7/8 POCSO Act Vide CS NO 06/2 022 dated 28.01.2022.
Hadien ka jingbishar ka ïing bishar ka a lap ba u donkti bad pynngat ïa u ha ka Section 6 jongka POCSO Act ban rai ban set phatok ia u haduh 20 snem bad ka kuna kaba 10,000 tyngka. Lada um lah ban siew ïa ka kuna u hap ban bteng ka jingshong phatok sa hynriew bnai. Kumba long kat haduh mynta u la shong phatok lypa 9 bnai bad 4 sngi. ïa kane ka kam la tohkit da u Rtd UBSI SA Sangma.
Ha kawei pat ka jingjia hadien 10 snem ba kawei ka khynnah kaba dang 10 snem ka rta kaba don jingduna ha ka bor jingmut jingpyrkhat ka la shah leh beijot ha Nongthymmai ha u runar Batskhembor Diengdoh, ka ïing bishar jongka Nongbishar R Rymbai ka la rai pynrem ïa u bad u hap ban shong phatok haduh 10 snem lynter. ïa kane ka hukum ka ïing Bishar ka la pynmih ha ka 25 tarik Nailur 2026 jongka Rynjah PS Case No 28(10)2016.
Ha ka jingpyllait khubor jong u SP mynta ka Sngi Ba Ar u la ïathuh ba ïa ka case la rejister ha 17 tarik Risaw 2016 hadien ba la ïoh pdiang ïa ka ejahar ha Nongthymmai Beat House ba utei u Batskhem Diengdoh u leh beijot ïa ka khynnah rit ba dang 10 snem bad ka don ka jingduna ha ka bor jingmut jingpyrkhat.
Ki pulit ki la kem ïa u bad ki la pynngat kyndon ne charge sheet ïa u kat kum ka CS NO 31/2017 dated 31.05.2017 ha ka Section 5 (k)(j) jongka POCSO Act. Ka ïing bishar hadien ba la bishar bad lap ba u donkti ha kane ka kam beaiñ ka la rai ban set phatok ïa u 10 snem ryngkat ka kuna kaba 30 hajar tyngka hapoh ka Section 6 jongka POCSO Act bad lada jia ba ym siew ïa ka kuna un hap ban shong phatok sa 3 bnai lynter. Une u la shah set phatol lypa la 3 bnai bad ar sngi. ïa kane ka jingtohkit la leh da ka WP Insp. BM Kharkongor ba don mynta ha ka tnad CID.