Ka jingïashah liang sop sop (Favouritism) ka pynjot bad pynsniewdur lut ïa ka longbriew manbriew (Babu Kular Khongjirem.)

Bun ki paidbah kim da tip bad sngewthuh bha ba, ka Jingïashah liang sop sop (Favouritism) ka long ka bih kaba sniew bad ba shyrkhei tam ban pynjot (destruction) bad bad ban pynngam (undermined) ïa ka longbriew manbriew (human kind) ha kane ka pyrthei. Shisien ba la leh shiliang khmat bad ïashah liang ïano ne ïano, la tikna lypa ba ha kita ki longing ki longsem (family matters), ka kam kur kam kha, ka kam shnong kam thaw, ka kam saiñ hima sima (political affairs) bad ki kam synshar khadar kim don don jaka shuh ka jinglong Hok ka jingtip briew tip Blei hynrei sa tang ki jingïa jot -ïa pra suda bad ka jingïadei (relationship) ruh kam don jaka shuh.
Ka jingïa ieit ïa burom kylliang ruh ka la jngai bah wat la kin shu ïa pynpaw ne ïa pyni jingïa ieit tang na rmiang shyntur suda. Hynrei, kito pat ki para liang kiba ïohkam, ïoh myntoi bad ïoh kabu na kaba ïa leh beiñ leh shiliang, ki da kmen da sngewbha, ki da phuh mut phuh mat bha bad ki da ïa ieit ïa burom bad ïajan shisha kham palat ban ïa ka bneng ruh. Kane ka lah ban jia ha kino kino ki longïing ha satlak ha kane ka pyrthei. Bishar shwa ha la ïing la sem, kin don hi ki Kmie ki kpa kiba thew shiliang ka man. Kin don hi ki kni ki kong kiba shu leh donbor, knieh bor ban shim kabu khlem pyrkhat shuh ia ka Hok ka nongrim bad ka jingshisha baroh bad ki da leh khla ban phuh mut phut mat hi kynjreng tang namar ba kin ioh pyn myntoi ïalade bad ka ïing ka sem ne ki khun ki kti jong ki. Peit ha ka longkur longjait khamtam ha ki kam shnong kam Raid ne kam hima sima, la jot la pra lut ki shnong ki thaw, ki it ki hima baroh tang namar jong ka jingleh shiliang khmat bad ia shah liang sop sop jong ki Rangbah shnong ne ki Sordar haduh ki Syiem ki mraw ki ju khot ki Syiem ki mraw ym dei shuh ban khot kum ki Syiem ki Kmie lada ki leh bein bad ba leh shiliang ne shah shiliang iano iano.
Ha ka politik lei, yn nai iakren shuh. Kiba kyrshan, puk puk ki ioh jingmyntoi khlem sangeh shuh la kumba hap u slap na bneng. Ki bym kyrshan pat,wat lada phi jaw ummat snam ruh, kin nym pynjaw satia iaphi wat tang shipiah ruh. Ki nongkyrshan jong ki party u MDC/MLA, Ministers, etc wat la ki la don ka ing lai mala saw mala, hynrei ki ioh kran (grant) tin, kran (grant) iing man la ka snem haduh ba kim lah pyndonkam shuh ia ka. Ki bym kyrshan pat, da ka ing sop plastik ba ioh rung lut ki syiar ki ksew ha ing, hynrei baroh shirta ruh ym don ba peit ne sngap satia ia ki. Hynrei, kaba shyrkhei bad ma tam eh ka dei ha ka rukom thung kam thung jam (appointment). Shisien ba la don hi ka jingiashah liang bad kwah thung kam (favour) na kiba heh kiba donbor ban thungkam iano iano, kata, kiba na jrong (minister,/MLAs/Directors/Head of institution,etc), wat khmih lynti shuh ba phin ioh ia kata ka kam ba phi applai (apply). Ia kito hi ki briew kiba la thmu bad ia shah da ki nongthung kam (authority/management) wat la km pat nang-pat stad satia ban thoh ne jubab ei ei ia ka exam (written interview) ne kim lah thoh ei ei, hynrei ki mark jong ki pat ki pynpaw ba ki ioh 80 mark shaneng. Ym donkam kyrdan MBA, MSc.MA, MCom hakhmat kito kiba la mut lypa ki nongthung kam ban thung kam ia ki kampher wat la kim pat pyndep (passed) class X satia ruh. Na ki shiphew hajar ngut kiba la nang la stad, ioh pynban da u bym poi pyrkhat satia bad u bym pat nang wat ban thoh shithi ne thoh esse ruh.
Ka la long shisha tang kum ka jingpynlut phut ha ka liang ka pisa tyngka (waste of money), lehnoh ei ka por (waste of time), leh noh ei ka bor pyrkhat pyrdain haba pynkhreh ne pule kot (waste of energy) ia ki nong applai kam kiba pli. Ki briew kiba ju leh ia kine ki jait kam leh thok- leh shukor, ki kam pap kam sang, kam phlan duman napoh napoh kim ju don shuh ka jingiatip lem (no conscience). Ka jingia tip lem jong ki ka la iap. Hakhmat hakhmat pat ki da nang ban leh myn leh kum ki angel. Sngewsih ban ong ba kum kane ka mynsiem iashah liang sop sop (Favouritism) ka la ioh rung bad phrung ruh wat ha ka mynsiem bad ka dohnud jong ki nongpyniaid ia ki jait Niam bapher bapher. Ki ialap (preached) da kumwei bad ki leh (practice) pat da khongpong. Tang kiba mad ia kane ki lah ban iahap ia kane ka jingthoh. Tang kiba phong ïa ka juti ki sngewthuh ba thar u prek. Tangba ngi dei ban kynmaw keiñ ba, ka nongkylliang ka ju jia kylla la phi leh ïa kaba sniew na kaba bha. U briew um lah ban ïohi ba phi leh thok, leh shukor beiñ ne leh beiñ leh khoh ïano ïano hynrei u “Blei pat un pynkit u bsein shi khoh”. U dieng sympat jong U Blei un sa don na sha lyndet jongngi. Ka bai nong, ka raibi bad ka jingpynshitom kaba kham shyrkhei kan jia khlem artatien, iaphi ne ia ki khun ki ksiew jong phi hadien habud. Ka nongkylliang kaba kham sniew ka ap lypa ban snoh ha piew (sniew hadien). Hap ia husiar bha namar kata, ba ïoh ngin kylla long pynban kum ki nongpynjot, ki nongleh pop- leh sang, ki nongshun bad ki Soitan (satans) kiba shyrkhei tam ia ka ri bad ka jaitbynriew baroh lada ngin dang iai bteng ban iai iashah liang sop sop tang ia kiba mon ba mon, ba don jingïajan ne ïadei, ne tang ia kiba iadei ba ha ïing ha sem. Lada phi sait khuid katno katno ruh, phim lah lait na ka jingshah kynnoh bam sap bam klop. Ki kam shukor, ki kam leh tuh leh thok jong phi pat ki kham shyrkhei bad kham ma pynban shibun wat ia kiba bam sap bam pong hakhmat ka pyrthei.