Nongpoh, Nailur 29: Ka jingpynkhreh ban kyntiew ïa ki kot ki sla ka SIR ha ka portal jong ka tnad election na bynta katto katne ki Polling Stations ha ka District ka dang sah. Ban pynkhuid bad pyndep noh ïa kane ka kam ha ka por kaba kloi, baroh ki ERO/AERO kiba dei khmih ki la shim ïa ki sienjam kiba donkam ban pynsted ïa ka jingpynkhreh bad jingpynpoi ïa baroh ki kot ba ïadei bad ka SIR kiba dang sah ha ka District.
La bthah ruh ïa ki BLOs ban leit na ïing sha ïing ban lum ïa ki kot ki sla na baroh ki paidbah kiba la ïoh ïaki kot, hynrei ki bym shym la wan mih ha ka jingpynsngew paidbah (hearing). Kane ka long ban pynsuk ban kyntiew noh ïa baroh ki kot ki sla kiba donkam sha ka ECINet Portal, katkum ka jingbthah jong ka Election Commission of India.
Shuh shuh, la seng ïa ki Help Desks ha baroh ki Block Office hapoh ka District ban ai jingïarap bad jingpynshai ïa ki nongthep vote ryngkat ki briew kiban ai jingïarap haba ïadei bad ka SIR.
Kumta, la kyntu ïa ki paidbah ban leit sha ki Help Desks kiba don ha ki Block ophis, lada ki donkam ïa ka jingïarap ne jingbthah kaba ïadei bad ka SIR.
Ki paidbah kiba donkam ïa ka jingïarap ne jingpynshai shaphang ka SIR ki lah ruh ban leit sha ka ophis u Deputy Commissioner (EL), Ri-Bhoi District, Nongpoh, lane SIR Help Desk lyngba u nombor 9863985792.
