Sngewhun ka Estimate Committee halor ka jingpynkhreh ïa ka National Games ha ka Jylla kaban long ha u 2027

Shillong, Nailur 29 : Ka Estimate Committee jong ka Iing Dorbar Thawain ka Jylla ha ka sngi Nyngkong ka la lum ïa ki Ophisar jong ka tnad Ïalehkai ban buddien bad syllok haba ïadei bad ka jingpynkhreh jong ka jylla na ka bynta ka National Games kaban long ha ka jylla ha u 2027.
Katkum ka jingïathuh da u Chairman ka Estimate Committee, Bah Mayralborn Syiem u la ong ba na ka liang ka tnad Sports and Youth Affairs ka la pynshai ïa ka Committee halor ka jingpynkhreh na ka bynta kane ka lympung ïalehkai kaba heh bha kaban long ha ka sien kaba nyngkong ha ka Jylla.
“Ki la pynshai kumno la pynkhreh ïa ki nongïalehkai, ki jaka ïalehkai ha kylleng ki bynta jong ka Jylla la ka long ha Shillong, Tura ne Jowai nalor kiwei ki jaka ha Ri Bhoi bad ha Shillong,” ong u Bah Mayral haba kren bad ki lad pathai khubor.
Shuh shuh u la ong ruh ba ki la pyntip halor ka jingpynkhreh na ka bynta ki jaka sah, ka jingpynbeit ïa ka leit ka wan. “Kam dei satia ka kam kaba suk ïa ka jylla hynrei haba ngi ïoh ïa ka jingshai na ka tnad halor ka jingpynkhreh ngi don ka jingkyrmen ba ka kam kan ïaid beit khamtam haba ngi dang ïoh por sa kumba 6 bnai ei ei,” u la ong.
Ha kajuh ka por u la ong ruh ba na ka Committee ki khmih lynti ba ïa ki jingtei bad ki jaka ïalehkai kiba dang pynbiang yn lah ban pyndep ha ka por kaba biang shwa ban sdang ka por ïalehkai.
“Kaba kham kongsan ka long ka jingpynkhreh bad ka jingkilan met jong ki khynnah ïalehkai jongngi na ka jylla ha baroh ki 39 tylli ki jait jingïalehkai kiban pynlong ha kane ka jylla bad kumjuh ha kiwei ruh ki jylla jong ka thain shatei lam-mihngi jong ka Ri, ba kin lah ban ïalehkai bha khamtam haba ka sorkar ka kyrshan borbah ïa ki nadong shadong kynthup ka jingleit pyntbit bad kiwei kiwei ki jingdonkam jong ki,” la bynrap biang u Chairman ka Committee.
Khatduh eh u la pynpaw ruh ba ka jingkyrmen ba ka Jylla kan ïoh ban khur bun ki takma na kane ka lympung la ka long naduh ki takma ksiar, ki takma rupa bad kampher wat ki takma rnong ruh kumjuh naba kin long ka burom kaba ïa ka jylla hi baroh kawei.