Nongstoiñ, Nailur 28: Ka seng Congress lyngba ka District Congress Committee West Khasi Hills, ha ka nyngkong jong ka taiew kum ka dak ka jingpynpaw pyrshah ïa ka jingleh ka sorkar BJP kaba synshar ïa ka Ri India, ka la thang ïa ka dur tyngshop jong u Gyanesh Kumar, Chief Election Commissioner ka ri India.
Kane ka jingle da ka seng Congress ka dei halor ka jingkynnoh ba la ïuh roit ïa ka hok ki paidbah haba ki jied ïa la u Nongmihkhmat ka jong ki, kim shym lah shuh ban jied laitluid namar ka la don ka jingleh thok leh shukor ban tuh vote. Kane ka dei kaba la pynpaw da u bah Eric Kharsyntiew President jong ka District Congress Committee mynta ka sngi ha phyllaw ka Congress Bhavan Nongstoiñ West Khasi Hills District.
Ka seng ka la kynnoh ba ther tyngeh ïa ka seng BJP bad ïa u Gyanesh Kumar Chief Election Commissioner ka Ri India ha kaba ka la ong ruh ba une u CEC u la kylla long pynban kum u ‘ñiangkohnguh jong ka seng BJP ym shuh kum u Chief Election Commissioner jong ka Ri India. Namar, ka la don ka jingailad ïa ka seng BJP ka sorkar hapoh ka jingïalam u Narendra Modi ban leh thok ne tuh ïa ki Vote u paidbah, ban pynjop jubor ïa la ki kyrtong jong ka seng BJP lyngba ka jingpyndonkam ïa ki bor technology.
Ïa katei ka jingthang tyngshop la pynlong ha phyllaw ka Congress Bhavan Nongstoiñ, ha kaba la ïadonlang ruh u Bah G.Ningstar Marthong President ka Nongstoiñ Block Congress Committee, u Bah J.T.S Thongni President ka Rambrai Block Congress Committee bad kiwei kiwei bad ki la ïa pyrta ruh da ki ktien ‘Down Down BJP’.
