DBTS, ka shlem saiñdur ïa ka lawei ki samla ha ki jaitkam ban ïohkam bad lah sengkam

Mike O.Kharraswai, Reporter

Shillong, Nailur 27 : Kam dei ka Engineering College lane ka skulbah kaba sei ia ki khraw pyrkhat, ki doktor lane ki ophisar hynrei ka dei ka shlem ai jinghikai ba jar jar ïa ki hajar bad ki phew hajar tam ki samla man u snem ba kin lah ban ïeng ha la ki jong ki kjat.
Kane ka shlem ai jinghikai kaba long ka jingkyrmen ia kiba bun ki samla kiba kwah ban ïeng ha la ki jong ki kjat ka dei ka – Don Bosco Technical School (DBTS) kaba don ha Laitumkhrah Shillong.
Lah ban ong ba ha ka pyrthei trei kam kaba kylla stet, ka jingdon tang ka kyrdan pule kam long kaba biang ban pynthikna ïa ka lawei jong uwei pa uwei u samla. Kumta ka jingdon ïa ka skill lane ka jinghikai pyntbit kaba lah ban pyndonkam, ka jingtbitbad ka jingshaniah ha lade ki long mynta ki bynta kiba kongsan ha ka jingpynkhreh ïa ki samla ban ïoh rung sha ka pyrthei wad kam kaba iar.
Kane ka long kawei na ki nongrim ba ka Don Bosco Technical School (DBTS) ka dang pynleit jingmut bha ha ka jinghikai jong ka – ban pynkupbor ïa ki samla ym tang da ka jingtip, hynrei da ki jingtbitbkiba lah ban ïalam sha ka lad iohkam bad khamtam eh ban sengkam bad aikam kylla ia kiwei pat.
Na ka liang u Mawphor haba ioh ban ia kren bad u Principal jong kane ka shlem, u Fr. Shining Dkhar, u la ban jur ïa kane ka jingthmu, da kaba pynpaw ïa ka jingdonkam ban ai ïa ki samla ïa ka lynti kaba lah ban ïalam ïa ki ban ïeng ha la ki jong ki kjat.
U la iathuh ruh ba ki samla kane ka juk mynta ki la sngewthuh ba dei tang ka jingpyntbit ialade ha ki jait kam ba ki kwah, ba kin lah ban ioh kam bad wat ban seng kam ruh. U la iathuh ba man u snem ym duna ia ka 8,000 ngut ki samla kiba wan shah hikai ha katei ka shlem kynthup naduh ki course kiba khyndiat bnai haduh kiba arsnem.
Lyngba kine ki jingpyntbit ba ki ioh, kane ka shlem ka plie sa kawei pat ka kabu ksiar ia kito kiba la pyndep ia ka jinghikai kata ka long da kaba ia tehlok bad ki kompeni kiba wan pat ban ai kam. Nalorkata la iathuh ruh ba ki ju don ki enrollment drive ha kaba ki kompeni bapher bapher ki wan ban jied ban ai kam ia kiba tbit.
Ha kajuh ka por, kane ka skhlem ai jinghikai ka don ruh ia ka synjuk kaba khlain bha jong ki khynnah skul barim ba la tip kum ka Past Pupil jong ka Don Bosco Technical School, Shillong. Kane ka kynhun ka don ruh ia ka bynta kaba khraw bha haba iadei bad ka jingiaid beit iaid ryntih jong kane ka jaka ai jinghikai ym tang ha ka jylla hynrei ha ka ri hi baroh kawei.
Ka dei ha ka 23tarik mynta u bnai ba kane ka kynhun ki la leit ban jurip lang ia baroh ki tnad ai jinghikai lane ki trade da ka thong ban ia kynduh bad ban ïaphylliew jingmut bad ki samla kiba dang pule mynta ha katei ka shlem ai jinghikai.
Ka Synjuk hapoh ka jingïalam jong u President, Bah Tobias Marak, bad ha ka jingsynran lang jong u Bah Thomas Passah, ryngkat bad kiwei pat ki dkhot, ki la pynpaw ruh ia ka jingkmen halor ka jingkiew arted jong kane ka jaka ai jinghikai kaba la pynlong briew da ki hajar ngut ki samla kiba pyndep na katei ka skul pyntbit.
Ka thong jong kine ki samla pule barim ban leit jngoh ïa katei ka shlem ka long ban pynshlur ïa ki samla kiba dang pule mynta ba ynda ki la pyndep ïa ka jingpule, kin ïasoh lang bad kane ka kynhun jong ki samla pule barim na ka bynta ban kyrshan bad plie lynti kylla ia kiwei pat kiba wan hadien.
Kane ka kynhun ka ju ïakynduh shi sien ha ka shisnem.Kumta, ki kwah bha ba kine ki samla kiba dang pule ha kane ka shlem kin pynrung kyrteng ïa lade ha ka ophis jong ka Pass Pupil, kaba don ha kane hi ka jaka ai jinghikai.
Kane ka kynhun, katba lah bad katkum ka bor kaba don, ka ju ai ruh ïa ka scholarship sha ki khynnah kiba wan na ki longïing kiba duk, khamtam eh ïa kiba wan na ki longïing kiba duk tam, khnang ba kin ioh ban bteng ïa ka jingpule jong ki.