Ngi buh ïa ki mat kiba ktah ïa ka jaidbynriew hakhmat bad ka shuki shadien: Lahkmen

Shillong, Nailur 27: U Myntri ka Sorkar bad MLA ka Amlarem u Bah Lahkmen Rymbui ula kyntait ba ka don ka jingdawa shuki hadien ba la dep pynïasoh ki 8 ngut ki MLA ka UDP sha ka seng BJP ha nongbah Delhi bad ula ong ba ki ishu ne ki mat kiba ktah ïa ka jaidbynriew ki wan hakhmat eh ban ïa ka shuki shadien.
Ki 8 ngut ki MLA hadien ba kila dep ban aiti ïa ka shithi ba ki leit pyniasoh sha ka BJP ha u Lamphang ka ïing Dorbar Thawaiñ ka jylla, ki la shah pdiang burom ha u President ka BJP Meghalaya u Rikman G Momin bad u Legislature Party Leader ka BJP bad Myntri Sorkar u Bah Sanbor Shullai ha ka ophis treikam jong ka BJP.
Haba jubab halor ka jingkylli, la ka don kano kano ka jingdawa shuki myntri ha katei ka jingïakut, u Bah Lahkmen Rymbui ula ong, “Kane ka jingdawa ïa ka shuki, la ka don ne kam don, ka dei kaba nga ngam don jingtip eiei, ki nongïalam kiba ha khliehduh ki lah ban tip, ngam lah ban ong eiei”.
Ula ong, ba ka jingthmu ka jongki kam dei satia halor ka shuki. “Kaei kaba ngi lah buh hakhmat eh, ka long ba ka shuki kam lah ban ïapeiñ bad ki mat jingdawa jong ka jaidbynriew. Ngi hap ban pyrkhat ïa katei, kam long kaba suk, ngi hap ban peit ïa kaei kaba ngi lah buh hakhmat eh” la bynrap u Bah Rymbui.
U Bah Rymbui ula ong, ba ka kynhun ka la mih da kaba suk na ka UDP da ka jingthmu kaba shai kdar ban shimkhia ïa ki jingangnud jong ki paiddbah ka jylla.
“Ngi lah mih na ka seng UDP da ka mynsiem kaba suk, khlem kano kano ka jingkhohñioh, namar kumba nga lah ong, kaei kaba ngi kum ki nongïalam ngi donkam, ngi donkam ïa ka jingïada, ngi donkam ïa ka roi ka par” ula ong.
Ula ong ba katei ka kynhun ka la pynpaw hakhmat ki nongïalam ha Delhi halor ki mat kiba kongsan kiba kynthup ïa ka FCRA, ban pynrung ïa ka ktien Khasi bad Garo ha ka Khyrnit ba Phra jongka Riti Synshar ka Ri, jingpynkylla ïa ki kyndon ka MRSSA, ban pynkynriah ïa kiba sah be-ain ha Them Metor, ban pynjynsur ïa ki kyndon ban tih dewiong bad ka jingai kyrdan ‘Minority Status’ ïa ki niam tynrai kum ka Niam Khasi bad Niam Tre.
“Ngi lah kren da kaba shai kdar hakhmat ki nongïalam kiba hakhlieh halor ka jingangnud jong ki paidbah ki jong ngi bad jong ki nongshong shnong” ula ong.
Halor ka jingai jingkular, u Bah Rymbui ula ong, ba ki la ïoh ia ki jingkular kiba biang.
“Nga lah kren ïa kitei ki mat ha ka ktien Khasi bad Phareng hakhmat jong ki nongïalam kiba hakhlieh bad kila ai ia ka jubab kaba biang halor kitei ki mat baroh. Ngam lah ban batai bniah halor katei, namar kam shim la mih na ka shyntur jong nga, hynrei kala mih hi na ka shyntur jong ki nongïalam kiba hakhlieh, Ngi dei ki briew kiba don ïa ka rukom pyrkhat pyrdaiñ kaba don jingkyrmen, kumta to ngin ïa long lang kiba don jingkyrmen” ula ong.