Da ka 20th Maniwell Jahrin Award shah pynkup burom ïa ki saw ngut ki khynnah skul

Mawkyrwat, ‘Nailur 27: Ha ka sngi saitjaiñ jong ka taïew ka 26 tarik u Nailur, 2926, ki khun ki kti u (L) Maniwell Jahrin kumba ju leh manla u snem, ki la pynlong ïa ka jingpynkup burom kyrpang ïa ki khynnah skul kiba la wan sha khmat ha ki jingïaleh eksam kata ha ka Secondary School Leaving Certificate Examination.
Lah ban kdew ba ha une u snem ba mynta u 2026, ki don 4 ngut ki khynnah skul na ka thaiñ Mawkyrwat kiba pass bha ha ka exam SSLC 2026 bad kiba la shah pynkup burom da ka 20th Maniwell Jahrin Award for Academic Excellence 2026 ba la pynlong hapoh Maharam Goverment Higher Secondary School Hall, Mawkyrwat.
Kum ban shu kdew, ïa kane ka Maniwell Jahrin Award for Academic Excellence la sdang nyngkong eh ha u snem 2004 da ki khun ki kti kum shibynta ban pynsah jingkynmaw bad pynsah nam ïa la u kpa u Bah Maniwell Jahrin (Bam Kwai Ha Duwar U Blei) bad ka jingsam ia ki khusnam sha ki samla pule ka long kum shibynta ban pynshlur bad ai mynsiem shuh shuh ïa ki samla ba kin nang leh bha shuh ha ki jingpule jong ki bad ba kin bud ia ka nuksa babha jong une u Riew Khraw.
Ha kane ka sngi la ïoh ban sam ïa ki khusnam da u kongsan sha ki samla pule bad ki samla kiba pass bha bad kiba wan shakhmat eh ha kane ka Exam SSLC 2026 ki long u Sunshinestar Nongsiej, u Saveful Kharjahrin, u Banjoplang Lyngdoh bad ka Banpyntngen Nongsiej.
Ha kane ka sngi u Bah Renikton Lyngdoh uba dei u MLA jong ka Mawkyrwat Constituency ula long u kongsan ha ryngkat ka jingdonlang ka kong Pearly Syiem Marak, u Rev. Dr. S.I. Iawphniaw, u Tony T.C Marak, u babu Bording Lyngdoh ki kmie ki kpa, ki nonghikai bad ki khynnah skul.