Hadien bala pyllait ïa ka bainong ki nongtrei Muster Roll, ai burom ki dkhot ïa u Chief Engineer ka PHE

Jowai, Nailur 27: Ka All Jaiñtia Muster Roll Workers & Labour Union (CEC) Jowai, ha ka jingïalam ka kong W. Rumut, kong W. Shullai Asstt General Secretary bad u ma Mutdashisha Papang President Union Muster Roll Workers PHE department, Jaiñtia Districts kila ai ïa ka jingsngewnguh bad ka jingsngewburom ïa u Rangbah R.S Nongbri Chief Engineer ka PHE bad ki staff ka CE office, Shillong halor ka jingïaleh shitom ka jong u ban pynbeit ïa ka jingtreikam haduh ba la lah ban pyllait ïa ka bainong (wage) kaba sah haduh palat saw bnai Iaiong- Naitung, 2026 ha ryngkat ka jingsiew bai bylla sngi da kaba thymmai (daily minimum wage) VDA April 2026 sha ki nongtrei Muster Roll ka PHE ha ka jylla.
Kane ka jinglehburom ka seng ka lap ba dei une u CE uba trei shitom shisha na ka bynta ki Muster Roll ka PHE ba ki la ïoh mynta ïa ka RCW kaba khlem treikam da ki phew snem bad ki la ïoh ïa ka tulop haduh u bnai August 2026.
Ka seng ka kyrpad jur ïa baroh ki head of department bad ki officer jong ki tnat ka Sorkar jylla kin pyntreikam noh kloi ïa ka EPF kaba ki Muster Roll ki dei hok ban ïoh naduh ki phew snem mynshwa, mynta kumba u Conrad K Sangma Hon’ble Chief Minister lyngba u Labour Commissioner ka jylla ki la ai hukum sha ki heh ki tnat ka Sorkar ba kin pyntreikam noh kloi ïa kane ka EPF.
Ka jingpyntreikam ïa kane ka EPF kan wanrah ïa ka jingshngaiñ ïa ka jingim bad ka lawei ha ki nongtrei bylla ka jylla ha ka liang ka pisa, ha kiba trei ha ki tnat Sorkar bad ki Contractor, ki company.
La synran lang ha kane ka sngi da ka kong A. Ryngkhlem Treasurer ka seng, u Lawan Gadew bad u Kat Bareh.