New Delhi, Nailur, 25: Ha ka jingbteng jong ka jingkhynra ha ki khappud ia ka kam khaii beain, ka Directorate of Revenue Intelligence (DRI) kala ioh kurup haduh T. 1,25,680 kilo ki kwai supari ba wan nabar ri bad 41,697 kilo ki symbai poppy, kiba baroh la kheiñ, kala poi haduh T. 20.31 klur, ha ka jingkhynra kane ka kynhun ba tbit ha ka jylla Mizoram bad Assam. Ha katei ka jingkhynra, la ong ba la ioh kem saw ngut kiba donkti ha kane ka kam khaiñ beaiñ ia ki symbai poppy.
Ha ka 23/Nailur/2026, ha ka jingleit kane ka kynhun ban khynra ia ki kam sniew ha Mizoram, ka DRI lem bad ka jingiarap jong ki Customs Champhai, 14th Battalion Assam Rifles bad Champhai Police, kila khynra ia ki lai tylli ki kudam buh mar ha ka shnong Ruantlang, Champhai District, kaba jngai kumba 20 kilometar na ka khappud jong ka Indo-Myanmar.
Hynrei la iohi ba baroh hangne, la lap ba la khang tala bad ym don briew. Ha ka jingkhynra hapoh kane ka jaka, la lap haduh 1,25,680 kilo u kwai supari ba wanrah nabar ri uba shongdor haduh T. 14 klur bad 25,440 kilo u symbai jong ki syntiew poppy ba shongdor haduh T. 3.81 klur. Haba la tohkit bha, la ong ba kine ki mar, la khaii beain na Myanmar sha India. La aiti noh ia kine ki mar hapoh ka jingpeit jong ka ain Customs Act, 1962.
Ha ka 22/Nailur/2026, la ong ba ha ka jing checking ki heh ophisar ka DRI lem bad ka jingiarap jong ka 38 Battalion Assam Rifles, la ong ba la don ka jingkhaii beain iaki symbai jong u syntiew poppy na khappud Mizoram sha Assam bad ka kynhun DRI bad ka jingiarap jong ka 38 Battalion Assam Rifles, kila lap iaki ar tylli ki trok hajan Lailapur, Silchar.
Haba la tohkit bha, na kine ki trok, la lap iaki song jong u 290 HDPE kiba don haduh 16,257 kilo kine ki symbai jong u syntiew poppy ba dei nabar ri. Kine ki song ki dei ki shonshap jong ki mar nabar ri kiba iadei bad ka kam khaii pateng bad ym biang ki kot ki sla.
Katba kine ki symbai poppy, kiba shongdor haduh T. 2.43 klur, lem bad kine ki ar tylli ki trok, la aiti noh hapoh ka jingpeit jong ka ain Customs Act, 1962. La kem ruh ia saw ngut kiba donkti ha kane ka kam khaii.
Ka jingioh kem ia kine ki kwai supari nabar ri, kaba long kawei na ki jingioh kem ba kongsan ha kine ki snem ba la dep ha kane ka thain lam mihngi, ka long ka jingjop bakhraw jong ka kynhun DRI ba ka lah ban teh lakam ia kum kine ki kam khaii beian ha ki khappud.
Katba ia ki symbai poppy la tip kum kita ki mar ba la pyrkhing ba hap hapoh ka ITC (HS) Classification of the Foreign Trade Policy bad kaba lah ban wanrah lada biang ki kyndon ba la bishar bniah, kynthup ba nyngkong eh ban ioh na ki ri ba la thung kyrpang bad ban rejister ne pynskhem iaki jutang wanrah mar bad u Narcotics Commissioner, Gwalior.
Ka jingioh kem jong ka kynhun DRI iaki kam khaii beain ha ki khappud jong ka India bad Myanmar ka long ka jingïada ban wanrah ïa ki mar ba khaïi beaiñ bad kiwei kiwei ki mar ba ïadei bad ka rep ka riang sha kane ka ri.
