Pynlong ka Cook-Cum-Helpers da ka jingshongkyllaiñ mungor halor ka PM POSHAN ha SWKHs

Mawkyrwat, ‘Nailur 22: Ka Union jong ki Cook-Cum-Helpers hapoh ka PM POSHAN Scheme jong ka South West Khasi Hills District, hapoh ka jingïalam jong ka kong Aibianghun Nongsiej, President jong ka Cook-Cum-Helpers PM POSHAN, South West Khasi Hills District, ka la pynlong ïa ka jingïashong kyllaiñ mungor mynta ka sngi ha Jakrem, Laitlsawsang, South West Khasi Hills District.
Haba kren sha ki lad pathai khubor, ka kong Aibianghun Nongsiej ka la pynpaw ba kane ka jingpynlong ïa kane ka jingshongkyllaiñ mungor jong ki Cook-Cum-Helpers ka long ban pynsngew ha ka sorkar ïa ki jingïakynduh jingeh jong ki nongshet ja ha ka liang ka jingïoh jingïarap pisa namar ka jingduna jong ka siew ne ka honorarium, bad ka la kyntu ïa ka Sorkar ba kan peit bniah ïa ki jingdawa jong ki, khamtam ha kaba ïadei bad ka jingpynkiew ïa ka bai-nong jong ki man la u bnai.
Ka la ïathuh ba ka Union ka dawa ba ka jingsiew ne ka honorarium kaba mynta kaba long ? 900 man la u bnai bad ki la dawa pat ba dei ban pynkiew noh sha ? 9,000 namar katkum ka jingïaid jong ka por bad ka la ong ruh ba ïa kane ka jingsiew kaba kaba dei ? 900 ha kine ki snem kiba la dep kam ju long ryntih bad don teng teng ki ju ïoh shisien ha ki lai bnai ne saw bnai bad kane ka pynshem jingeh ïa ki. Namarkata, ka la pynpaw ba lada pynkiew ïa ka honorarium kan sa long ka jingïarap kaba kham biang ïa ki nongtrei Cook-Cum-Helpers bad ïa ki longïing jong ki, namar kiba bun na ki ki dang ïakynduh jingeh tang na ka daw jong ka jingduna ka jingïoh jingïarap pisa.
Ha kajuh ka por, ka la ïathuh ruh ba kane ka jingïakhih ka long ruh kum kawei na ki lad ban pynsngew sha u Narendra Modi u Myntri Rangbah duh jong ka Ri India, ïa ki jingeh jong ki halor ka honorarium kaba ki ïoh mynta. Katkum ka jingpynpaw jong ka, ka Union ka sngew ba ka bai-nong kaba ki ïoh mynta kam biang haba pynïanujor bad ka jingkylla jong ka ïoh ka kot bad ka jingkiew dor jong ki mar bad ki jingdonkam ha ka jingim ha ïing ha sem.
Ka ka Nongsiej ka la ïathuh ruh ba ka Union ka la ai por ïa ka Sorkar haduh 9 tarik u Risaw 2026 ban peit bad pynbeit ïa ki jingdawa jong ki bad lada kam shimkhia ne leh bym suid ñiew ïa ki jingdawa jong ki hapoh kane ka por ba la buh, ka Union ka lah ban shim ïa ki rai kiba kham eh, kynthup ruh ïa ka jingpyrkhat ban sangeh noh shwa ïa ka jingshakri ban shet bam ha ki skul.