Kubur u SP Traffic ba la ïohpdiang ïa ka Legal Notice, ngin sa jubab ong u Hari Prasath

Shillong, Nailur 22: U Hari Prasath MR uba dei u Superintendent of Police (Traffic) ka East Khasi Hills, ha ka sngi Ba-ar, ula ong ba ki Heh Pulit kila ioh pdiang ïa ka legal notice ba ai da ka Khasi Students’ Union (KSU) bad kan sa ai jubab lyngba ki lynti jong ka ain.
Ka KSU ha ka sngi Nyngkong kala ai legal notice ïa u SP (City), Shillong Bah Dangsan Khyriem bad SP Traffic Hari Prasath MR.
“Hooid, ngi la ioh pdiang ïa ka legal notice.Ïa mynta kam pat long ïa ngi ban kynthoh eiei ïa kaei kaba don ha kane ka notice.Namar ba ka dei ka legal notice, ngin sa jubab lyngba ki lynti jong ka ain kiba dei” ong u Prasath ha ka sngi Ba-ar.
Ka KSU kala dawa, hapoh 15 sngi, ïa kine ki heh Pulit ba kin pan map paidbah lyngba ki lad pathai khubor bad ban nym pynmih shuh ïa ki jingkynnoh ba bakla bad ba pynjah burom pyrshah ïa ka KSU bad ïa ki nongialam.
“Kum ka tnad ba pyntreikam ïa ka ain, ki don katto katne ki rukom treikam ha man ki kam bad ïa kane hap ban ïaid lyngba ki lynti ka ain.Kam ïahap ïa nga ban kynthoh eiei” ula ong.