Kiew ka Langsning FC sha ka kyrdan ba nyngkong ha ka miej kheiñ point jong ka SPL

Shillong, Nailur 22 : Ka lahduh ha ka snem ba la dep, ka Langsning FC ka la kiew sha ka kyrdan kaba hakhlieh tam ha ka miej kheiñ point jong ka Shillong Premier League 2026, hadien ba ka la pynliem ïa Nangkiew Irat da 3-0 kol ha ka jingïakhun kaba long ha madan SSA Stadium mynta ka sngi.
Ïa kine ki kol ha kanek asngi la thep da u Samuel Phawa ha ka minit kaba 65 bad na u Syed Ahmed ha ka minit kaba 70 jong ka kylla miet, katba ïa ka kol kaba lai pat la thep da u Mebanshngain Kurkalang ha ka minit kaba 79.
Mynta, ka Langsning ka la ïoh 13 point na 6 tylli ki jingïalehkai, kaba pynlong ïa ka ban 2 point ïa Mawlai bad Shillong Lajong. Hynrei Mawlai ka dang don kawei ka jingïalehkai kaba dang sah. Nangkiew Irat pat ka don ha ka kyrdan ba phra da 7 point.
Ha ka kylla step, u Yhoto Lohe u la ïalehkai bha na bynta Nangkiew Irat bad u la pyrshang ban thep kol, hynrei ki bol ba u khyrwit ki la leit sha shabar kol bad kane ka la pynlong ïa u rangap kol Langsning, u Rajat Paul Lyngdoh ban ym da khuslai than.
Na ka liang ka Langsning, u Kyrmenskhem Mukhim u la khyrwit tyngeh ïa ka bol hynrei ka bol ka la leit pynban shabar ka kol. Ka kol ba la khyrwit da u Richie Kharbani ka la shah khanglad ha u rangap kol jong ka Nangkiew, Surjay Kumar Pariyar.
Ha ka kylla miet, Langsning ka la pynkhlain shuh shuh ïa ka rukom ïalehkai jong ka bad kane ka la nang kyla hadien ba u Samuel u la mih na ka jaka shong ben ha ka por ba kut ka kylla step bad u la thep ïa ka kol kaba nyngkong hadien ba ki rangïalehkai dien jong Nangkiew Irat ki khlem poi pyrkhat ba un ïoh ïa katei ka kabu ksiar.
Hadien san minit, u Ahmed u la thep ïa ka kol kaba ar da kaba sangeh da ka khlieh ïa ka bol. Hadien kane u Mebanshngain u la thep ïa ka kol kaba lai hadien ba ka jingpyrshang jong u kaba nyngkong la lah ban khanglad da u Surjay.
Watla Nangkiew Irat ka la shah tehlakam ha ka jingïalehkai, ka la ïoh ban pyrshang thep kol ar sien lyngba Wallamsuk Nongkhlaw, hynrei baroh ar ki bol ki la leit sha shabar jong ka kol.
Ha ka jingïalehkai lashai, Rangdajied United kan ïakhun pyrshah ïa Nongkseh ha ka por 3 baje janmiet. Kine ki kynhun baroh ar ki don mar 7 point marwei. Hynrei ka Nongkseh ka don shakhmat ha ka jingïapher ha ka jingïoh thep kol da +5, katba Rangdajied ka don 0 bad Nangkiew Irat mynta ka don -3.