Jur ka jingwanrung kyrthep ki Bangladesh na khappud jong ka thaiñ War Jaiñtia

Jowai, Nailur 21: Ka War Jaiñtia Students’ Union (WJSU) kawei na ki kynhun trei mon sngewbha, mynta ka sngi 21 tarik u Nailur kala leit ujor syndon sha ka Sub-Divisional Officer (Civil) Amlarem West Jaiñtia Hills District, halor ka jingïoh lad palat ki briew na Bangladesh ban wan rung kyrthep shapoh ka Ri India lyngba ka Dawki bad na kiwei de ki jaka khappud jong ka thaiñ War Jaiñtia.
Ka seng kala pynsngew ba ka thaiñ Amlarem Civil Sub-Division ka ïasam ïa u khappud uba jrong bha bad ka Ri Bangladesh.Kumta ki nongshong shnong, ki nongïalam shnong bad ki Dorbar Shnong ki ju ïohi bunsien ïa ki briew kiba wan rung beaiñ bad ban leit trei nongbylla sha kiwei pat ki bynta jong ka Jylla.
La ïathuh tang hapoh une u bnai mynta u snem ka jingrung beaiñ kala long kaba jur bha, dang shen ki pulit kila ïoh kem haduh 18 ngut ki nong Bangladesh kiba rung beaiñ da ka kynhun, la kem ruh ïa ki 8 ngut ki nongñiah kali trai ri lem bad ar ngut ki nongpynïaid.La ïoh bat kumjuh ïa ki 27 ngut ki nong Bangladesh (16 ngut ki shynrang bad 11 ngut ki kynthei) kiba la ïaid beaiñ na ki bynta zero point bad thmu rung tuh shapoh ka ri.
Ki samla trai shnong ki la ïoh bat ïa ka kali kaba kit ïa lai ngut ki briew ki bym don ïa ki kot ki sla bad hadien ki la pynpaw ba ki dei ki nongshong shnong jong ka Bangladesh.La ïathuh ba ki dalal (ki nongkhaïi) na ka thaiñ kiba la tyrwa pisa pynban ban pyllait ïa ki.
Baroh kine ki jingjia ka pyni naduh ki nongñiah kali, ki nongkhaïi bad ki nongpynïaid na ka thaiñ kila ïarap ïa kane ka kam pynrung beaiñ ïa ki nong Bangladesh, wat ïa ki surok jong kane ka thaiñ War Jaiñtia la pyndonkam kum ka lynti ban pynïaid ïa ki sha kiwei pat ki bynta jong ka Jylla.
Ka jingïoh lad ki briew bar Ri ban rung beaiñ khlem ka passport, ka Visa ne ka Permit kaba biang, ka dei ka kam bymman katkum ka Foreigners Act, 1946 bad ka Passport (Entry to India) Act, 1920 ong ka seng WJSU bad ka jingïoh lad jong ki ban wan buhai shnong khlem da tehlakam ïa ki ka buh jingma ïa ka jingbun briew, ka khyndew ka shyiap bad ka riti dustur jong ki trai ri trai muluk (Khasi-Jaiñtia), kiba hap hapoh ka Sixth Schedule.
Shuh shuh la pynpaw ba kane ka lah ban pynmih ïa ka jingeh hadien habud, naduh ka rukom im, ki jingshakri paidbah bad ka khyndew ka shyiap, kane kan pynmih jingeh ruh haka jingshngaiñ jong ki nongshong shnong ha ki jaka khappud.
Ka Meghalaya Residents Safety and Security Act, 2016 kaba dawa ban pynrung kyrteng ïa ki bym dei ki trai shnong bad ka jingpyntreikam ïa kane ka aiñ ha kaba paw ka long kaba biang eh, la pynsngew ka seng.
Halor kane ka jingïohlad ki nong Bangladesh ban rung beaiñ, la kyntu ïa ki bor pulit bad ïa ki bor pahara khappud ba kin pynjur shuh shuh ïa ka jingpahara ha shilynter ka Dawki bad baroh ki jaka khappud ha ka thaiñ Warjaiñtia.
Haka juh ka por dei ban pynshisha ïa ki nongbylla bad ki nongshong wai bym dei ki trai shnong hapop ka Sub-Division bad ban pynthikna ïa ka jingpynrung kyrteng jong ki katkum ka Meghalaya Residents Safety and Security Act, 2016. La kyntu ïa baroh ki nongpyntreikam, ki kontraktor, ki trai jaka bad ki trai Hotel/lodge ba kin buh beit ïa ki jingthoh khamtam ïa ki bym dei ki trai shnong bad ban pynmih ïa ki jingpynshisha katkum ka jingdawa.
La dawa jur ban pynshitom da kaba shim ïa ki sienjam kiba tyngeh pyrshah ïa ki agent, ki nongkhaïi bad ki nongshong shnong kiba ïarap ïa ki nongwan rung beaiñ shapoh ka jylla.
Na ka liang ka seng ka kloi ban ïa treilang bad ki paidbah nongshong shnong kumjuh bad ki bor sorkar ban tehlakam bad ban khanglad ïa ka jingwan rung khyrthep ki briew kiba na Bangladesh.
Ka seng kala kren shai lada ki bor ba dei peit kim lah ban leh eiei ïa kine ki mad jingdawa ba donkam kyrkieh, ka Warjaiñtia Students’ Union kan shim ïa ki lad ki lynti ban leh hi dalade na ka bynta ka jingmyntoi jong ki paidbah bad ka jingshngaiñ jong ka khyndew ka shyiap jong ki trai ri trai muluk.