Ïoh jinghikai ki khynnah skul kynthei ka Jowai Presbyterian H/S halor rukom ïada ïalade
Jowai, Nailur 20: Ka ophis jong ka District Hub for Empowerment of Women (DHEW), Social Welfare Department, West Jaiñtia Hills District ha ryngkat ka jingïatreilang bad ka Happy Red Rooster, Shillong hynnin ka sngi saitjaiñ kila pynkut ïa ka jingai jingshikai ban ïada ïalade ne ka ‘Self Defence Training’ kaba san sngi ïaki khynnah kynthei jong ka Jowai Presbyterian Higher Secondary School Jowai.
Ïa kane ka prokram ai jinghikai kala sdang naduh ka 14 tarik u Nialur, 2026 ha Jubilee Hall, Balang Presbyterian Jowai, Mission Compound, hapoh ka prokram Beti Bachao Beti Padhao (BBBP).Ka jingthmu jong kane ka jingai hikai ka long kum ka lad ban ai jingshngaiñ ïa ki khynnah kynthei ba kin tip kumno ban ïada ïalade.
Ha ka sngi pynkut ïa ka prokram la don ka jingïalang bala pynïaid da ka S. Lamare, Gender Specialist, DHEW, West Jaiñtia Hills. Ka kong A. Lamare, ka nonghikai ka Jowai Presbyterian Higher Secondary School, Jowai kala ai khublei kyrpang ïa ka tnad kaba la pynlong ïa kane ka prokram ai jinghikai ban ïada ïalade. Kala ban jur ïa ka jingdonkam jong ki kynthei ban nang ïa ka jinghikai halor ki rukom ïada ïalade ban ïaleh pyrshah ïa ki riewsniew.
La ai jingbatai ruh na u Isaiah Founder, Happy Red Rooster, MMA Shillong, uba la pynshlur ïa ki samla pule ba kin pyndonkam ïa ki sap ki phong kiba ki la ïoh jinghikai bad ban don ïa ka akor. Ula ban jur ïa ka jingdonkam ban long kiba husiar bad kiba la pynkhreh ban ïakynduh ïa ki jingeh.
Ha kane ka sngi la sam ruh ïa ki Certificate sha ki 134 ngut ki samla pule kiba la pyndep hok ïa ka jingshah hikai.
U bah F.G.N Ryngnga, District Mission Coordinator, DHEW, West Jaiñtia Hills ula ai ki kyntien ai khublei bad pynshlur ïa ki samla pule ba kin dang ïai bteng ban pynmlien ïa ki sap ki phong kaba ki la ïoh bad ban pyndonkam ïa ki ha kino kino ki jingma kiba lah ban kynduh. Ula ai jingmut ruh ba lada don kano kano ka jingjia ki dei ban pyntip mar mar sha ki pulit ba hajan ne sha ki bor ba dei peit.