ïoh bat ka JSU ia arngut ki suba nong Bangladesh ha jingtalasi kali ha ka thaiñ Demthring

Shillong, Nailur 20 : Ka Jaintia Students Union (JSU)-Jowai Circle, ka la ïoh ban bat ïa lai ngut ki nong Bangladesh ha ka jingtalasi kali ha ka thaiñ Demthring, ha ka sngi U Blei. Katba ka HYC pat ka dawa ban thung da ka jingtohkit halor ka jingïoh rung ki 27 ngut ki khar Bangladesh na Dawki bad mano ba ïalam lynti ïa ki ban poi shaduh Guwahati namar dei tad haduh ba kin da poi ha Guwahati ki sa shah bat ha ki bor pulit ka Assam.
ïa kine ki lai ngut la ïoh bat na kawei ka kali Tourist rong lieh(ML 04-E-3485) ba la register ha ka kyrteng u Bah Treibor Kyndait ba na Shkenpyrsit.
Ka JSU ka la kam ba ha ka jingpeit bniah ïa ki kot ki sla, kine ki laingut ki la phla ba ki dei ki nong Bangladesh.
ïa kine ki briew la ïalam noh sha Jowai Police Station bad la aiti sha ki Pulit. Ka JSU kala ujor ruh ïa ka ejahar pyrshah ïa ki.
Ka JSU ka la kam ruh ba ki don ki briew kiba donkti ha ki kam pynrung briew beaiñ na Bangladesh, ki la pyrshang ban wad ïa ki lad ki lynti bad ki la thong pisa da ki lak tyngka ban pynlait noh ïa kine ki nong Bangladesh ba ïoh bat.
“Ki la tyrwa pisa ïa ngi ba kot da ki lak tyngka ban pynlait noh ïa kine ki briew. Ngi la kyntait ïa kane ka pisa bad ngi la leit ban ujor ïa ka ejahar” ong u Education Secretary ka JSU Bocheru Mi Pohsnem.
Ka HYC ka buh da u dak jingkylli uba heh bha “ Kumno ba kine ki 27 ngut ki ïoh ban rung na Dawki, shong da ka kali lyngba ka Meghalaya ban poi sha Guwahati hato kane kam pynpaw ba kam biang ka jingpahara ha khappud bad hapoh ka jylla namar ym don mano mano ba talasi ïa ki?
Ka HYC ka sngewthuh ba ki bynta khappud ki long kiba khohruh khohram, ki lynti ïaid kiba lehse ki bor pahara khappud ruh kim lap dien namar ki don beit ki briew kiba ïalam bad btin lynti ïa ki naduh khappud haduh ban poi shaduh Guwahati bad kane ka dei kaba la jia da ki snem lynter.
Hynrei wat la ki bor synshar bad ki bor pahara khappud ki tip eh shaphang kane ym shym la shim ïa ki lad ki lynti ban khanglad bad ïoh kem ïa ki naduh khappud. Ka sorkar kam lah ban shu kheiñ sting ïa kane ka kam bad ka dei ban shim khia bha wat lada ïoh bat ïa ki da ka Assam ruh. Namar ka jingkylli ka long ki ïoh ban rung na khappud Meghalaya khlem kano kano ka jingpynwit ïa ki bad kane ka pynpaw ba ki don ki kynhun ne ki riew shimet kiba ïalam lynti ïa ki. Ka seng ka dawa ba dei ban thung da ka jingtohkit ban lap ïa kine ki briew kiba donkti ha kane ka kam pynrung tuh ïa ki mynder ri sha kane ka thaiñ hi baroh kawei. Lada lap ïa kiba donkti dei ban kem bad pynshitom ïa ki kat kum ki kyndon aiñ ong ka seng.
Ka seng ka dawa ruh ban pynkhlaiñ ïa ka jingpahara ha kito ki jaka ba la suba ba ki pynlong kum ki lynti ïaid. Donkam ka jingïatrei lang hapdeng ki BSF ki pulit ka jylla Meghalaya bad Assam bad khamtam ban ïa pashat jingtip mar kylliang ban tehlakam ïa kane ka jingïoh rung laitlan ki nong Bangladesh sha kane ka thaiñ.
“ Ym lah ban long ba ka Meghalaya kan long kum ka lynti ïaid ïa kine ki mynder ri ki paidbah ki kwah ban ïohi da ki kam ym tang da ki jingkular khlem ki kam” pynkut ka seng.