Kumno uVijay marwei u lah ban bat haduh 16 tylli ki tnat sorkar kylli u President ka VPP

Shillong, Nailur 20: U President ka Voice of the People Party (VPP) president u Bah Ardent Miller Basaiawmoit u la kynnoh ba ka sorkar ba la ïalam da ka NPP ka Meghalaya Democratic Alliance (MDA) ka la wanrah ia ka jingsngew kynhun hapdeng ki heh ophisar ha ka jylla da kaba ong ba kane kan ym lam shano shano ruh.
Ïa kane u la ong ha ka jingïalang kaba la long ha ka sngi saitjaiñ ha ka Nongkrem hadien ba la wai bad ong, “Kano kano ka party kaba synshar ïa ka jylla kam dei ban thaw ki lad kynhun hapdeng ki officer. Ki ophisar kiba treihok kim ïoh ka lad bad kane kan pynduh nong ïa ka jylla Meghalaya,” u la ong.
U Bah Basaiawmoit u la kynnoh ba ka sorkar ka thung ïa ki officer ki ban suk ban pynïaid bad kiba mon ban bud ïa ki hukum katba ki ophisar kiba lah ban trei ki bym kohnguh ïa ki jingpynïaid jong ka sorkar ki shah eh beiñ ha ki tnat bad kumjuh ruh ha ka sorkar bad kiba ka sngew mon.
U la kdew ïa u Dr Vijay Kumar D, uba bat kumba 15-16 tylli ki tnat, kumno tang uwei u officer un lah ban trei bha haba u bat ïa kiba bun ki tnat sorkar ne portfolio. “Kum kine ki pynhiar dor ïa ka kyrdan jong kiwei pat ki ophisar kiba tbit ban trei ïa ka kam,” u la ong.
U MLA ka Nongkrem u la ong ba bun na ki officer ki kwah ban synniang ïa ka jylla ha ka roi ka san hynrei ki la shah kyntait. “Kane ka dei ka jingpulom na ka liang jogn ka sorkar bad ki paidbah kin sa bishar halor kane ka jingleh,” u la ong.
Haba phai sha ka State Pay Scale kaba dei lyngba ka Structured Pay Framework (SPF), u Bah Basaiawmoit u la ong ba ka sorkar ka la sngewthuh ïa ka jingbakla.
U la ai khublei ruh ïa nonghikai kiba la pynbor ïa ka sorkar halor kane ka bynta bad kumjuh ruh u la ai khublei ïa ka sorkar ba ka la pynbeit ïa kane ka jingbakla kaba ka kdew da ka VPP.