Rai ka sorkar ban pynneh ïa ka Deficit System weng noh ïa ka SPF na bynta ki nonghikai

Shillong, Nailur 18 : Kum ka sienjam ban weng ïa ka jingartatien hapdeng ki nonghikai bad ki nongwad kam, ka Tnad Education ka Jylla ka la weng noh ïa ka jingpynbna (notification) ba 12 tarik Nailar kaba ailad ban pyndap ïa ki kam ba lait jong ka State Pay Scale lyngba ka Structured Pay Framework (SPF).
Ka jingpynbna ba la pynmih da u Commissioner & Secretary Vijay Kumar Mantri ha ka sngi Palei ka ong “U Lat ka Jylla u sngewbha ban hukum ba ïa ka jingpynbna ba 12 tarik Nailar 2026, lah weng noh mardor”.
ïa kane ka jingpynbna ha u bnai Nailar la pynmih haba pyntreikam ïa ka jingmynjur ba la phah ktien da ka Tnad Finance bad ka jingkular ban ai ïa ka jingsiew kaba tam, kaba mih na ka jingpyntreikam ïa ka SPF, kaba shah ban pyndap ïa ki kam ba lait hapoh ka State Pay Scale lyngba ka SPF haduh u snem mang tyngka 2027-28.
Hynrei, ka Sorkar kala pynpaw ba kane ka hukum “kala pynmih ïa ka jingsngew artatien bad sngewthuh bakla hapdeng ki nonghikai Sorkar, ki nonghikai deficit bad ki nongwad kam haba ïadei bad ka jinglong jingman jong ki kam nonghikai bala mang da ka Sorkar bad ki nonghikai deficit bad ka lawei jong ka deficit system ba don mynta lem bad ka Pay Scale ka Sorkar”.
Haba pynmih ïa ka jingpynshai, ka Tnad ka la ong ba kane ka jingpynbna kam mut ba “ïa ka deficit system ba don mynta yn bujli noh da ka Structured Pay Framework” lane ba “ïa ki kam nonghikai deficit ba la mang lane ki kam nonghikai Sorkar la pynduh noh, lane bujli da ka kam SPF”.
Ka la pynshai ruh ba “ka jinglong jingman jong ka jingshakri ba ïaid mynta, ka jingpynbeit ïa ka jingsiew lane ka jinglong jingman ki nonghikai ba la thung hapoh ka deficit system lane ka government pay scale la pynkylla noh da kane ka jingpynbna”.
Haba batai ïa ka jingthmu, ka Sorkar ka ong ba ka jingpynbeit ba shipor ka long ban “ailad ïa ka Tnad, ha kane ka por ba shipor, ban pynbiang ïa ki jingdonkam nonghikai ba mardor da kaba thung/phah ïa ki nonghikai kiba biang kyrdan hapoh ka Structured Pay Framework lyngba ka State Education Mission Authority of Meghalaya (SEMAM) na ki jingdonkam nonghikai ba don lypa ha ki skul Sorkar”.
Ka Tnad kala ban jur ba ka Sorkar ka “kut jingmut ban pynneh ïa ka jingdon ki nonghikai bala mang”.
Ka jingpynbna ka ong ruh “Ka jingweng ïa kane ka jingpynbna kam dei ban mut kum ka jingpynduh, jingpyndem, jingpynkylla lane bujli ïa kano kano ka kam nonghikai sorkar bala mang lane ki kam nonghikai deficit bala mang”.
ïa kane ka hukum la pynmih ban wanrah ïa ka jingshai bad pynthikna ïa ka jingsngewthuh kaba shai da baroh ïa kaei kaba long haba ïadei bad ka deficit system, government pay scale bad structured pay framework.