Kem ki pulit bad rah sha ïingkashari ïa ar ngut kiba shah kynnoh tynrah ïa u Addl. SP

Shillong, Nailur 18: Ki ar ngut ki nongshah kynnoh ha kaba iadei bad ka jingkhyra naka ha Urkaliar, ki pulit kila rah noh sha District bad Sessions Court ha Shillong ha ka janmiet sngi Thohdieng hadien ka jingjia aksiden ha kaba u Additional Superintendent of Police (Addl SP) u la mynsaw jur.
Ïa kine ki ar ngut kiba la shah kem ka ïing kashari kala hukum ban set 14 sngi hapoh judicial custody na ka bynta ban tohkit bniah halor ka jingkynnoh ba tynrah da ka ar shaka ia u pulit Traffic Additional SP u Lovish Garg ha ka shiteng miet ha Urkaliar .
Katei ka jingjia ka la jia ha ka por kumba 1:30 eiei mynstep jong ka sngi palei ha kaba ki pulit ki dang pynlong ïa ka jingkhynra naka hajan ka Samkhamti Petrol Pump ha Urkaliar kum shi bynta ban peit ïa ka suk ka sain.
Katkum ki pulit, kitei ki arngut ki ñiah da ka scooty bad la kynnoh ba ki la pyrshang ban phet krad na ka naka ha ka jaka ban sangeh haba la bthah ban leh kumta.Ki pulit ki la iathuh ba katei ka scooty hadien kata ka la tynrah ïa u Addl SP, kaba la pynmynsaw jur ïa u.Mar mar la pynkit noh ïa u sha Woodland Hospital bad mynta u don hapdeng ka jingsumar.
La rejistar case hapoh ka jingkynnoh ba thmu pyniap briew, katba ki pulit ki dang bteng ban tohkit ïa ki jingjia kiba don ha katei ka jingjia, kynthup ïa ka jingleh ba la kynnoh jong u nongshah kynnoh bad ka jingthmu, lada don.
Kitei ki arngut kiba la shah kynnoh, la suba ba ki dei ki dkhot jong ka Khasi Students’ Union (KSU).
U Superintendent of Police SP (city) u bah Dangsan Khyriem, u la ong ba ïa kane ka jingjia dang pynlong ïa ka jingtohkit bad ba ki pulit kin sa leh ïa kaba donkam katkum ka jinglap jong ka jingtohkit.
U la ong ruh ba ka jingkhynra bad ka jingpahara jong ki pulit kan dang bteng kum shi bynta jong ki lad jingïada bad u la kyntu ïa ki paidbah ban kohnguh ïa ki jingbthah ba la pynmih da ki pulit.