Ai khublei ka BJP ïa ka sorkar ba la pyndam ïa ka bhah MBBS jong ka wat ba nyngkong

Shillong, Nailur 16: Ka BJP Meghalaya ka pynpaw ïa ka jingsngewnguh ïa ka Sorkar Jylla kaba la pyndam noh ïa ka bhah pule MBBS jong ka wat ba nyngkong hadien ba la mih ka jingpyrshah na ka state unit jong ka party bad kiwei kiwei ki seng ba pawkhmat jong ka jylla.
Katkum ka kyrwoh khubor na u Bah Mariahom Kharkrang uba dei u nongaiktien ka BJp u la ong, Ha ka jingpeit bniah ïa ki jingai jaka katto katne ki jingbym ïahap kiba jur ki la paw ha kaba ïa ki samla pule kiba la ioh ïa ki kyrdan kiba kham bha la iehnoh bein bad ai sha kiwei pat, ki samla pule kiba kham poh kyrdan.
“Ngi sngewnguh ba ka Sorkar hapoh ka jingïalam u Conrad Sangma ka la shim khia ïa ki jingpyrshah ba la wanrah da u MLA ka BJP u Bah A. L. Hek bad ki kynhun samla pule” ong u Bah Kharkrang.
Ha ka shithi sha u Myntri ka Koit ka Khiah, ryngkat bad ka kopi sha u Myntri Rangbah, u Bah Hek u la kdew ïa ki mat jong ki jingbym ïahap na ki kyndon ba la pdiang ha kaba jied ïa ki kyrtong.
U Bah Kharkrang u la ong, “Ngi thikna ba ka Sorkar kan pynthikna ia ka jinglong hok ïa baroh ha ka por ba jied thymmai bad ngi ai ka jingkitbok kitrwiang ïa ki samla pule kiba dei hok”.