Nga la phah ruh ka jingthoh ha u Conrad ban nym pat pdiang ïa ka rai pynbna kyrtong MLA 2028: Mandilos Nongbri
Mawkyrwat, Nailur 16: Hadien 8 sngi jong ka jingpynbna kyrtong MLA 2028 jong ka NPP Ranikor Block Unit bad pynskhem da ka sur paidbah ïa ka kyrteng jong u Nelbi T. Sangma, mynta ka sngi ka 16 tarik u Nailur, 2026 ki paidbah nongkyrshan jong ka NPP Ranikor Constituency ha ka jingïalam jong u bah Mandilos Nongbri ki la pynlong ïa ka jingialang ha shnong Nongjri, South West Khasi Hills District ban pynpaw bad pynsngew paidbah ba da lei lei kin nym pdiang bad pyrshah jur ia katei ka jingpynbna kyrtong MLA 2028 ia u Nelbi T. Sangma.
Haba kut jong ka jingïathir ïatai ba sani bha ha ka jingïalang ba ki la dep ban pynlong, u bah Mandilos Nongbri haba ai jingkren ha ki lad pathai khubor, u la ong ba na ka liang ki nongkyrshan jong ka NPP Ranikor Constituency kim pdiang ia katei ka rai kaba la pynlong ha ka 8 tarik mynta u bnai ha ka Sohliwai jong ka shnong Rangthong ha kaba u bah Nelbi T. Sangma u ba dei ruh u President jong ka Ranikor Block Unit ula pynbna ia lade kum u kyrtong ha ka election 2028 khlem da iaid kat kum ki kyndon jong ka party.
Shuh shuh u bah Mandilos Nongbri u la kynnoh ruh ba ka jingpynlong ia katei ka jingialang ha ka 8 tarik mynta u bnai ha Sohliwai, Rangthong ka dei tang ka jingïalang ban ïalam bakla bad kaba shu thok ïa u paidbah, haba ki khot ïa u paitbah ban ïa kren ia kiwei ki bynta kiba dei bad ka MP elekshon shiteng samoi hynrei ki leh pat da kawei ka bynta da kaba shim rai ban pynbna MLA Elekshon 2028.
Namarkata, halor katei ka jingpynbna jong katto katne ïa u kyrtong, na ka liang ki rangbah nongïalam jong ka NPP Ranikor Constituency ki la leit ban ïa kynduh bad jingthoh ha u National President jong ka NPP, u Conrad Sangma da kaba ki la pynpaw ha u ba kim lah ban pdiang ïa katei ka rai, bad na ka liang jong u Conrad Sangma ruh u la kubur ba yn nym lah ban pdiang ïa katei ka rai kaba na ka liang u bah Nelbi T. Sangma bad u bah Kitborlang Nongrem kaba ki la pynbna namar ki khlem ïaid katkum ka kyndon jong ka party bad ka la long pyrshah ïa ki kyndon jong ka party.